ეკონომიკის მინისტრის, ნათია თურნავას განცხადებით, თბილისის მერიისთვის გამოიყოფა 400 000 ლარი, რათა საახალწლო ღონისძიებებში, რომელიც ტელევიზიით გადაიცემა, ჩაერთოს რაც შეიძლება მეტი კულტურის მოღვაწე. მისივე თქმით, ეს გადაწყვეტილება გაახარებს ბევრ კულტურის მოღვაწეს, რომლებიც არსებულ შეზღუდვებში დაზარალდა.

„მნიშვნელოვანი საკითხი, რაზეც დღეს უწყებათაშორისმა საკოორდინაციო საბჭომ იმსჯელა და მიღებულ იქნა გადაწყვეტილება, ეს ეხება ჩვენი კულტურის მოღვაწეებს, მუსიკოსებს. მოგეხსენებათ, რომ ჩვეულებრივ დროს, პანდემიამდე, ისინი ყოველთვის ძალიან აქტიურად იყვნენ ჩართულები საახალწლო, საკონცერტო ღონისძიებებში, რომლებიც იმართებოდა, როგორც სხვადასხვა სასტუმროში, ასევე სხვადასხვა რესტორანში მთელი საქართველოს მასშტაბით. დღესდღეობით, ჩვენი კულტურის მოღვაწეები, მუსიკოსები, მოკლებულები არიან ამ შესაძლებლობას, ვინაიდან, არსებული შეზღუდვების გამო, იცით, რომ არ იფუნქციონირებენ რესტორნები, ჩვენ, ასევე, მკაცრად ავუკრძალეთ სასტუმროებსაც საახალწლო, საკონცერტო ღონისძიებების გამართვა, ეს არის აკრძალული.

შესაბამისად, მივიღეთ გადაწყვეტილება და ქალაქ თბილისის მერიას გამოეყოფა 400 000 ლარი, ასიგნება, იმისთვის, რომ მან, თავის მიერ ორგანიზებულ საახალწლო ღონისძიებებში ჩართოს რაც შეიძლება მეტი კულტურის მოღვაწე, მუსიკოსი, ვინც სხვაგვარად ამ შესაძლებლობას არიან მოკლებულები. იცით, რომ ქალაქ თბილისის მერია გეგმავს სხვადასხვა საახალწლო, საკონცერტო პროგრამას, რა თქმა უნდა, უსაფრთხო რეჟიმში, მაყურებლის გარეშე, რომელიც გადაიცემა ტელევიზიით და ვფიქრობთ, რომ ძალიან სწორი, კარგი და დროული გადაწყვეტილებაა, რომელიც გაუხარდება ძალიან ბევრ კულტურის მოღვაწეს ამ რთულ ვითარებაში და ამ შეზღუდვებში, ვინც, რა თქმა უნდა, დაზარალდა“, — განაცხადა ეკონომიკის მინისტრმა.

თბილისის მერმა, კახა კალაძემ განაცხადა, რომ დახმარება კულტურის სფეროს წარმომადგენლებსაც სჭირდებოდათ. მისი თქმით, პანდემიის გამო მათ ბევრი პრობლემები შეექმნათ და ისინი მარტო არ უნდა დაეტოვებინათ.

მერი აღნიშნავდა, რომ კონცერტები არ იქნება ერთჯერადი და, ასევე, გაიმართება შობას და ძველით ახალ წელს. საზოგადოების მხრიდან კრიტიკა მოჰყვა ამ ფაქტს, რადგან კონცერტზე დასწრებას მოქალაქეები შეზღუდვების გამო ვერ ახერხებენ.