პლატფორმა Knife.ge ცოტა ხნის წინ გაეშვა და ის ხელნაკეთი, სალაშქრო, სანადირო თუ სხვადასხვა ტიპის დანების შესაძენად შექმნილი ადგილია. პლატფორმა ამჟამად წარმოდგენილია ონლაინ მაღაზიისა და ფეისბუქ ჯგუფის სახით, სადაც თითქმის ყველა ფუნქციონალური კატეგორიისა და ბრენდის დანის შეძენაა შესაძლებელი. დანების ფასი 100 ლარიდან იწყება და აქ საკმაოდ ძვირადღირებულ მოდელებსაც ნახავთ.

პლატფორმის შესახებ მის დამფუძებელს, ჯაბა ბოკუჩავას ვესაუბრეთ.

ვისთვისაა Knife.ge?

Knife.ge საინტერესო სივრცეა შეფმზარეულებისთვის, მონადირეებისთვის, დანის კოლექციონერებისთვის, ადამიანებისთვის, რომლებიც მუშაობის დროს ყოველდღე იყენებენ დანებს. გასაყიდად განთავსებული ეგზემპლარები ძირითადად ხელით არის შექმნილი, უნიკალური და განსაკუთრებულია. თითოეული დანა ოსტატის ისტორიას ყვება.

ჩვენი მთავარი სიამაყე ჩვენივე დამზადებული პროდუქციაა. ჩვენთან განთავსებული პროდუქციის დიდი ნაწილი ქართველი ოსტატების ხელითაა დამზადებული. ვცდილობთ, მუდმივად განახლებული პროდუქცია შევთავაზოთ ჩვენს მომხმარებელს, ამ ყველაფრის განსახორციელებლად კი აქტიურად ვთანამშრომლობთ გამოცდილ ოსტატებთან.

ჯაბა ბოკუჩავა

გარდა დანებით დაინტერესებული კოლექციონერებისა თუ პროფესიონალებისა, ეს არის სივრცე, სადაც დანის ოსტატები შეძლებენ გამოფინონ ხელნაკეთი, უნიკალური დანები, მიიღონ ობიექტური უკუკავშირი და წინასწარი შეკვეთები.

Knife.ge-ის დამფუძნებლის თქმით, დანებით თავის დროზე მამამ დააინტერესა: მამაც მცირე კოლექციონერი იყო და შემდეგ მეც გავაგრძელე ეს ჰობი. დანას ჩვენთვის ყოველთვის ქონდა ესთეტური სილამაზე, თუმცა ამ საქმეს სიფრთხილე და დიდი პასუხისმგებლობაც მოსდევს.

როგორ აღმოაჩინეთ ოსტატები, რომელთა ნამუშევრებიც პლატფორმაზეა განთავსებული?

ოსტატებს ვპოულობ სხვადასხვა გამოფენებზე მაგ. არტგენზე არიან ხოლმე. ინტერნეტშიც ბევრი ათავსებს თავის ნამუშევრებს. მართალია, საკმაოდ ნიშური პროდუქტია, მაგრამ ძალიან ბევრი ბლოგია და ბევრი პროფესიონალი, ვინც ამ მიმართულებით მუშაობს. კარგი ოსტატის განსაზღვრელი არის დიდი გამოცდილება და ცოდნა ამ საქმის, ჭედვის, ფოლადისა და მხატვრული დიზაინის მიმართულებით.

სამჭედლო ზენ ბანი ერთ-ერთია, ვინც საკუთარ ნამუშევრებს knife.ge-ზე ათავსებს. ზაქარია ბაკურაძეს უკვე 10 წელზე მეტი გამოცდილება აქვს სამჭედლო საქმეში და მის მიერ დამზადებულ თითოეულ მოდელს ფეისბუქზე აუდიტორია დიდი ინტერესით ელის ხოლმე.

ასე რომ, ახლა უკვე დანებით დაინტერესებული კოლექციონერებისა ან პროფესიონალებისთვისაც არსებობს ონლაინ პლატფორმა, რაც მათთვის საჩუქრის შერჩევას ერთიორად აიოლებს.