დაავადებათა კონტროლის ცენტრის ხელმძღვანელის, ამირან გამყრელიძის განცხადებით, ინფექციური საავადმყოფოს დირექტორს, თენგიზ ცერცვაძეს წარსულში ის ადამიანების ეკითხებოდნენ, რომლებიც ახლა მას აკრიტიკებენ. საკოორდინაციო საბჭოს სხდომის შემდეგ, გამყრელიძემ კოვიდპაციენტებთან რემდესივირის გამოყენებაზე ისაუბრა.

როგორც მან განმარტა, ქვეყანაში უნდა იყოს სხვადასხვა საშუალება, რომლის გამოყენების საშუალებაც კლინიცისტებსა და კლინიკურ ჯგუფის გადაწყვეტილებით შესაძლებელი იქნება. ჯანდაცვის ექსპერტების ნაწილის აზრით, რემდესივირის გამოყენება ცერცვაძის პირადი სურვილია და სწორედ ამას ეხებოდა ჟურნალისტების კითხვებიც, რაზეც გამყრელიძემ უპასუხა:

"მე პიროვნულ დავაში არ შემოგვყებით. მე პასუხს ვცემ ჯანდაცვის ყველა ექსპერტს, რომელიც თავის თავს უწოდებს ჯანდაცვის ექსპერტს ან აღიარებულია ექსპერტთა საზოგადოების მიერ, ამავე დროს, თენგიზ ცერცვაძე გახლავთ ერთ-ერთი ყველაზე ცნობილი და გამოცდილი კლინიცისტი ქვეყანაში. სიტყვებს ახირება, გადახირება, ძალიან გთხოვთ, ნუ ხმარობთ. რადგან ის არის ერთ-ერთი გამოცდილი ექიმი ქვეყანაში, რომელსაც ჭკუას ეკითხება ძალიან ბევრი ადამიანი და თავის დროზე ჭკუას ეკითხებოდა ის ხალხი, ვინც დღეს მას აკრიტიკებს".

საქართველოში რემდესივირი 17 დეკემბერს შემოვიდა. როგორც ჯანდაცვის სისტემის წარმომადგენლები ამბობენ, ის მხოლოდ ჰოსპიტალიზირებული, მზიმე პაციენტების შემთხვევაში იქნება გამოყენებული და საზოგადოებას ფართო ხელმისაწვდომობა მასზე არ ექნება.