ხვალ თბილისში აქცია გაიმართება, რომელზეც მოქალაქეები იმ ავარიაში მონაწილე მძღოლის დასჯას მოითხოვენ, რომელსაც 26 წლის გოგოს სიცოცხლე ემსხვერპლა.

აქციის ორგანიზატორების ინფორმაციით, ავარიაში მონაწილე სავარაუდო პირი პროკურატურამ ხელწერილის საფუძველზე გაათავისუფლა.

აქცია ხვალ, 28 იანვარს, 5 საათზე პროკურატურასთან გაიმართება.

"26 წლის გოგონას მკვლელი თავისუფალი არ უნდა იყოს! აგრეთვე უნდა მოვითხოვოთ კანონის გამკაცრება" - წერია ღონისძიების ფეისბუკ გვერდზე.

რუსთაველის გამზირზე 24 იანვარს, ღამით, ორი მანქანის შეჯახებისას, ერთ-ერთ ავტომობილში მჯდომი ერთი ადამიანი გარდაიცვალა, სამი კი დაშავდა.

საქმეზე შსს-მ გამოძიება დაიწყო. უწყებამ აღნიშნულზე დღეს განცხადებაც გაავრცელა.