რუსთაველის გამზირზე 24 იანვარს, ღამით, ორი მანქანის შეჯახებისას, ერთ-ერთ ავტომობილში მჯდომი ერთი ადამიანი გარდაიცვალა, სამი კი დაშავდა.

შსს-მ გამოძიება სისხლის სამართლის კოდექსის 276-ე მუხლის მე-5 ნაწილით დაიწყო.

სამინისტროს ინფორმაციით, გამოძიების ფარგლებში, დაინიშნა ტრასოლოგიური, ავტოტექნიკური და სასამართლო-სამედიცინო ექსპერტიზები:

"აღნიშნული დასკვნების საფუძველზე, საგამოძიებო ორგანოს ექნება მტკიცებულებათა ერთობლიობა, რათა ავტოსაგზაო შემთხვევაში დამნაშავე პირის მიმართ განხორციელდეს კანონის შესაბამისი ღონისძიებები.

რაც შეეხება ავტოსაგზაო შემთხვევაში მონაწილე სამივე მძღოლს, მომხდართან დაკავშირებით ისინი პოლიციის მიერ მოწმის სახით გამოიკითხნენ".

შინაგან საქმეთა სამინისტრო საზოგადოების ინფორმირების მიზნით განმარტავს, რომ კანონის თანახმად, ავტოსაგზაო შემთხვევაში ბრალეული პირის გამოკვეთა და მისთვის ბრალის წარდგენა მხოლოდ შესაბამისი ექსპერტიზების დასრულების შემდეგაა შესაძლებელი.

"შს სამინისტრო მიმართავს მაქსიმალურ ძალისხმევას, რომ აღნიშნული საქმე დროულად იქნას გამოძიებული და დამნაშავე წარდგეს მართლმსაჯულების წინაშე" - აცხადებენ უწყებაში.

ხვალ რუსთაველზე მომხდარ ავარიაში მონაწილე პირის დასჯის მოთხოვნით აქცია გაიმართება.