თბილისში, რუსთაველის გამზირზე 24 იანვარს, ღამით ავტოსაგზაო შემთხვევა მოხდა. ორი მანქანის შეჯახებისას, ერთ-ერთ ავტომობილში მჯდომი ერთი ადამიანი გარდაიცვალა, სამი კი დაშავდა.

არსებული ინფორმაციით ავარიის შედეგად დაიღუპა გოგო, რომელიც ტაქსით მგზავრობდა, ხოლო ავტოსაგზაო შემთხვევა ემ ელის ტიპის ჯიპის ბრალი იყო, რომელსაც ნასვამი მამაკაცი მართავდა.

როგორც შსს-ს პრესამსახურში აცხადებენ, გამოძიება სისხლის სამართლის კოდექსის 276-ე მუხლის მეხუთე ნაწილით მიმდინარეობს. ამ ნორმის მიხედვით, ავტომობილის მოძრაობის უსაფრთხოების ან ექსპლუატაციის წესის დარღვევა იმის მიერ, ვინც ამ სატრანსპორტო საშუალებას მართავს, რამაც გამოიწვია ადამიანის სიცოცხლის მოსპობა, ისჯება თავისუფლების აღკვეთით ვადით ოთხიდან შვიდ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.