ლონდონში ტრადიციული საახალწლო ფოიერვერკი წელს არ მოეწყობა. მის ნაცვლად BBC-ის პირველ არხზე 2020 წლის გამორჩეული მომენტები გადაიცემა.

იმის გათვალისწინებით, რაც ამ დროისათვის გაერთიანებულ სამეფოში ხდება, ლონდონის მერის, სადიქ ხანის მიერ სადღესასწაულო ღონისძიების გაუქმება მოულოდნელი გადაწყვეტილება არ არის.

"კოვიდპანდემია იმას ნიშნავს, რომ წელს ვერ მოვახერხებთ, ტემზის ნაპირებზე მსოფლიოში განთქმული ღონისძიება ჩავატაროთ", — აღნიშნავს ხანი, რომელიც შოუში თავად არ გამოჩნდება, — "თუმცა, მნიშვნელოვანია, გადავხედოთ და დავაფასოთ წლის განმსაზღვრელი მომენტები, შემდეგ კი 2021-ს იმედით შევეგებოთ. სწორედ ამიტომ, BBC One-ზე სპეციალურ შოუს შემოგთავაზებთ".

"ვიცით, რომ ახალი წელი ტრადიციულად ის დროა, როცა მსოფლიოს ჩვენი შესანიშნავი ქალაქის დიდებულებას ვაჩვენებთ, ამას კი წლეულს ისევ შევძლებთ შოუთი, რომლის ყურებასაც მხოლოდ სახლიდან შეძლებთ", — აცხადებს BBC, — "ეს იქნება იმედის ზეიმი და მომენტი, როცა გადავხედავთ ამ წლის გამოწვევებს და იმას, როგორ დაუდგნენ ლონდონელები ერთმანეთს გვერდში".

განწყობის ასამაღლებელ და მაყურებლების გასამხნევებელ შოუზე ბრიტანეთის საზოგადოებრივი მაუწყებელი 2020 წლის ყველაზე საოცარი და ემოციური მომენტების ჩვენებას აპირებს, რომელთა შორისაც, სავარაუდოდ, მოქალაქეების მიერ NHS-სთვის (ქვეყნის ჯანდაცვის ეროვნული ცენტრი) დაკრული მადლობის ტაშიც მოხვდება.

ლონდონის ყოველწლიურ საახალწლო ფოიერვერკს 100 000-მდე ადამიანი ესწრებოდა, რაც, პანდემიის პირობებში, ცხადია, ვერ მოხერხდება. ამასთან, გაერთიანებული სამეფოს დედაქალაქში ღამის საათებში არც მეტროპოლიტენი იმუშავებს და არც პაბები ახალი წლის სადღეგრძელოს სათქმელად და ძველი წლის გასაცილებლად.

გაერთიანებულ სამეფოში კი შეზღუდვები კვლავ გამკაცრდა, მას შემდეგ, რაც ქვეყანაში კორონავირუსის ახალი, უფრო სწრაფად გადამდები შტამი გამოვლინდა. მისით ინფიცირების შემთხვევების მატების გამო რამდენიმე ქვეყანამ გაერთიანებულ სამეფოსთან საჰაერო მიმოსვლა შეაჩერა, საქართველოში კი ბრიტანეთიდან შემოსულ პირებს 2-კვირიანი კარანტინის გავლა უწევთ.