რუსეთისგან S-400-ს საზენიტო-საჰარეო სისტემის შეძენის გამო, აშშ-მ თურქეთს, კერძოდ, თავდაცვის ინდუსტრიების ადმინისტრაციას (SSB) სანქციები დაუწესა. ამის შესახებ სახელმწიფო დეპარტამენტის განცხადებაშია ნათქვამი.

სანქციები მოიცავს SSB-სთვის აშშ-ს ყველა საექსპორტო ლიცენზიასა და ნებართვაზე შეზღუდვას. ამასთან, SSB-ს პრეზიდენტსა და სხვა ოფიცრებს გაეყინებათ აქტივები და ქვეყანაში შესვლა აეკრძალებათ.

"შეერთებულმა შტატებმა არაერთხელ განუმარტა თურქეთს მაღალ დონეზე, რომ S-400-ის სისტემის შესყიდვა საფრთხის ქვეშ დააყენებდა აშშ-ს სამხედრო ტექნიკასა და შემადგენლობას და რუსეთის თავდაცვის სექტორს არსებით კაპიტალს შესძენდა, ამასთან, რუსეთს საშუალებას აძლევდა წვდომა ჰქონოდა თურქეთის შეიარაღებულ ძალებსა და თავდაცვის ინდუსტრიაზე", — აცხადებენ სახელმწიფო დეპარტამენტში.

ისინი მოუწოდებენ თურქეთს, S-400 სისტემის საკითხი დაუყოვნებლივ აშშ-ს სთან კონსულტაციებით მოაგვარონ.

მიიჩნევა, რომ S-400 ერთ-ერთი ყველაზე თანამედროვე ანტისარაკეტო სისტემაა მსოფლიოში. მას ერთდროულად 80 ობიექტის განადგურება შეუძლია, როგორც დრონების, ისე თვითმფრინავებისა და რაკეტების.

S-400 ტიპის საზენიტო-საჰარეო სისტემის შესყიდვის გამო ვაშინგტონსა და ანკარას შორის ურთიერთობა წლების წინ დაიძაბა. სისტემის შესაძენად თურქეთმა და რუსეთმა 2,5 მილიარდი დოლარის ოდენობის ხელშეკრულება 2017 წელს გააფორმეს. მოსკოვმა სისტემის მიწოდება 2019 წელს დაიწყო.

აშშ-ს უკმაყოფილო იყო იმით, რომ NATO-ში მისი მოკავშირე S-400-ს რუსეთისგან ყიდულობდა. ვაშინგტონი ანკარას სამომავლო სანქციებზე აფრთხილებდა. აშშ მოითხოვდა, რომ თურქეთს S-400-ზე უარი ეთქვა და ანალოგიური ამერიკული სისტემა Patriot ეყიდა. გარდა ამისა, ვაშინგტონი ამტკიცებდა, რომ რუსული სისტემა ალიანსის თავდაცვის ქსელთან შეუთავსებელია და შესაძლოა საფრთხის ქვეშ დააყენოს ამერიკული გამანადგურებელი Lockheed Martin F-35, რომლის წარმოებაშიც თურქეთია ჩართული.

აშშ-ს გაფრთხილების მიუხედავად, თურქეთმა შეთანხმებაზე უარი არ თქვა და აღნიშნა, რომ S-400 ამერიკული F-35-სგან მოშორებით განლაგდება. თავის დროზე თურქეთის საგარეო საქმეთა მინისტრმა, მევლუთ ჩავუშოგლუმ განაცხადა, რომ რუსეთზე არჩევანი მას შემდეგ შეაჩერეს, რაც ევროპულმა და ამერიკულმა მწარმოებლებმა პროდუქციის მიწოდებაზე უარი თქვეს, რადგან თურქეთის პირობები უარყვეს.