ინგლისში, ბრისტოლში, შენობის კედელზე იდუმალი გრაფიტისტის მორიგი ნამუშევარი გამოჩნდა.

ნამუშევარი, რომელსაც "აფცხიკ!!" ("Aachoo!!") შეერქვა, ტოტერდაუნის უბნის ერთ-ერთი სახლის კედელზეა გამოსახული და წარმოგვიდგენს ქალს, რომელსაც თავსაფარი აქვს შემოხვეული და აცემინებს, მისი კბილის პროთეზი კი ჰაერშია გამოსროლილი.

ადგილობრივი დეილ კომლი ამბობს, რომ ხუთშაბათს, 10 დეკემბერს, დილით ვიღაც "დიდი ტიპი" დაინახა, რომელსაც შუქამრეკლი ჟილეტი ეცვა. მისი აზრით, ის ბენქსი იყო.

არტისტმა მოგვიანებით ამ ნამუშევრის ავტორობა საკუთარ ვებსაიტსა და ინსტაგრამზე დაადასტურა.

როგორც ცნობილია, სახლის კედელზე არსებული ნამუშევარი დაფარული იყო, სანამ ხუთშაბათს დილით მას გამოაჩენდნენ.

27 წლის დეილ კომლი, რომელიც იმავე ქუჩაზე ცხოვრობს, ამბობს, რომ დილის 7 საათზე ყავას ადუღებდა და ფანჯრიდან იყურებოდა, როდესაც ვიღაც კაცი დაინახა: "შუქამრეკლი ჟილეტი ეცვა, საპირისპირო მხარეს მოაჯირს ეყრდნობოდა და მთელი დრო კედელს უყურებდა. მოგვიანებით, სადღაც ერთ საათში, გარეთ გავიხედე და ქუჩაში ძალიან ბევრი ადამიანი იდგა".

ფოტო: Tristan Kay

ტოტერდაუნში მდებარე ვეილ-სტრიტი ქვეყნის ერთ-ერთი ყველაზე ციცაბო ქუჩაა. ყოველწლიურად 22-გრადუსიანი დახრილობის მქონე ამ ქუჩაზე აღდგომის კვირადღის კვერცხების გაგორების შეჯიბრი ტარდება და ბევრი ადამიანი იყრის თავს.

ხელოვნების ნიმუშმა, რომელიც ვეილ-სტრიტის ქვედა ნაწილში გამოჩნდა, ადგილობრივი მაყურებლების დიდი ყურადღება მიიპყრო.

34 წლის ტომმა თქვა, რომ სირბილის მარშრუტი შეცვალა, რათა ამ ნამუშევრის სანახავად მოვიდეს ხოლმე. "ვნახე, რომ ხალხი Twitter-ზე ამაზე საუბრობდა. მგონია, რომ ძალიან კარგია — ნამდვილად აქტუალურია", — თქვა მან.

47 წლის ჯეისონ ბარტლეტმა, რომელიც იმ ქუჩის ახლომახლო გაიზარდა, თქვა: "ეს ახალ ამბებში მოვისმინე და ვიფიქრე, რომ მივსულიყავი და მენახა. ბენქსი ყოველთვის ძალიან მომწონდა. ალბათ, ეს მათთვისაც ძალიან საინტერესო იქნება, ვინც ამ სახლს ფლობს".

ფოტო: Tristan K

ფოტო: Tristan Kay