მოქალაქეების ერთ-ერთი ლიდერი, ლევან იოსელიანი ამბობს რომ პარტია პარლამენტში მარტო არ შევა. რუსთავი 2-თან საუბარში მან თქვა, რომ შეთანხმების მიღწევა ჯერ კიდევ შესაძლებელია და თუ ასე მოხდება, პარლამენტში სხვა პარტიებიც შევლენ,

"ჩვენს მიერ წარდგენილ მოთხოვნებზე, გვაქვს შესაძლებლობა, რომ ოთხივეზე მივაღწიოთ შეთანხმებას. ოთხივეზე თუ მივაღწევთ შეთანხმებას, მარტო პარტია მოქალაქეები კი არა, ყველა იქ მყოფი პარტია შევა პარლამენტში. ეს ასე იქნება. მარტო ჩვენ, პარლამენტში არ შევალთ, იმიტომ, რომ მარტო ჩვენ შესვლას აზრი არ აქვს. იმიტომ კი არა რომ ვიღაცის მერიდება. რომ ვხედავდე რომ აზრი აქვს, არავისი არ მერიდება და შევიდოდი. რომ ვხედავდე, რომ ეს რაღაცას მოუტანს ამ ქვეყანას, მაგრამ, ვერც ამ ქვეყანას ვერ მოუტანს ვერაფერს და ვერც რეალურად შეცვლის სურათს", — ამბობს იოსელიანი.

მისი თქმით, ახლა მთავარი ამოცანა მოლაპარაკების პროცესის გადარჩენაა.

"მთავარი არის გადავარჩინოთ შეთანხმების პროცესი, შეთანხმება მივიყვანოთ ბოლომდე და გამოვგლიჯოთ ხელისუფლებას ისეთი დოკუმენტი, რომელიც იქნება ამ ქვეყნის ხვალინდელი დღისთვის მომავლის გარანტია და გადარჩენის შესაძლებლობა. ეს არის სამართლიანი საარჩევნო სისტემა", — განაცხადა ლევან იოსელიანმა.

მე-10 მოწვევის პარლამენტის პირველი სხდომის პარალელურად ბარიერგადალახული ოპოზიციური პარტიები მოსწავლე ახალგაზრდობის სასახლის ბაღში შეიკრიბნენ, საპარალამენტო მანდატებზე უარი თქვეს და ამის შესახებ განცხადებას ხელს საჯაროდ მოაწერეს ხელი. თუმცა, იქ არ მისულან მოქალაქეების წევრები, ალეკო ელისაშვილი და ლევან იოსელიანი.

გარდა ამისა, ოპოზიციური პარტიების ნაწილმა, ცესკოს ოფიციალური განცხადებით მიმართა საარჩევნო სიის გაუქმებასთან დაკავშირებით.

გაიგეთ მეტი: