დღეს, 25 იანვარს საკონსტიტუციო სასამართლო თეთრი ხმაურის მოძრაობის საკონსტიტუციო სარჩელს განიხილავს. სასამართლო პროცესი ამ წუთებში მიმდინარეობს. დავის საგანია სისხლის სამართლის კოდექსის 265-ე მუხლი, კერძოდ კი, ნარკოტიკული საშუალების შემცველი მცენარის დათესვა, მოყვანა ან კულტივირება.

მოძრაობას სადავოდ მიაჩნია 265-ე მუხლის ის ნორმატიული შინაარსი, რომელიც მცენარე კანაფის დათესვისა და მოყვანისთვის თავისუფლების აღკვეთას ითვალისწინებს.

კერძოდ, მოსარჩელე მხარე მიიჩნევს, რომ 265-ე მუხლი წინააღმდეგობაში მოდის საქართველოს კონსტიტუციის 17-ე მუხლის, მე-2 ნაწილთან მიმართებით – (დაუშვებელია ადამიანის წამება, არაჰუმანური, სასტიკი ან პატივისა და ღირსების შემლახველი მოპყრობა და სასჯელის გამოყენება).

თეთრი ხმაურის მოძრაობამ საქართვერლოს საკონსტიტუციო სასამართლოს სარჩელით 2016 წლის 10 მარტს მიმართა. საქმეზე დასაშვებობის გადაწყვეტილება 2016 წლის 20 დეკემბერს გამოცხადდა. საქმეს განიხილავს საქართველოს საკონსტიტუციო სასამართლოს პირველი კოლეგია. დღევანდელი პროცესის შემდეგ მოსამართლეთა კოლეგია სათათბიროდ გავა, გადაწყვეტილებას კი მოგვიანებით გამოაცხადებენ.