მუხიანის 153-ე საბავშვო ბაღის ერთ-ერთი აღსაზრდელის მშობელი ბაღის აღმზრდელს შვილის ცემაში ადანაშაულებს.

როგორც დედა ტელეკომპანია იმედთან ინტერვიუში აცხადებს, ბავშვს სახეზე სისხლჩაქცევები აქვს. მისი თქმით, დაზიანებების აღმოჩენის შემდეგ, მან პატრულში დარეკა, შემდეგ კი ბავშვი იაშვილის კლინიკაში გადაიყვანა, სადაც, მისი თქმით, დაუდასტურეს, რომ სახეზე შემჩნეული სიწითლეები დაზიანებით იყო მიღებული.

აღსაზრდელის მშობლის თქმით, ბავშვი თავად ამბობს, რომ მას ბაღში მასწავლებელმა სცემა, თავად აღმზრდელი კი ბრალდებას უარყოფს.

როგორც ბაგა ბაღის მართვის სააგენტოში On.ge-ს განუცხადეს, აღმზრდელი, ბაღის ადმინისტრაცია და მშობელი გასაუბრებისთვის დაბარებულები არიან. სააგენტოში ასევე გვითხრეს, რომ აღმზრდელმა ბრალდების შესახებ სააგენტოსგან შეიტყო, რადგან დედას სამშაბათს ბავშვის გაყვანის შემდეგ ბაღისთვის აღარ მიუმართავს.

სააგენტოში აცხადებენ, რომ აღმზრდელი ბრალდებას უარყოფს და ამბობს, რომ ბავშვი სახეს იქავებდა, რაზეც დედას ჰკითხა კიდეც, მის შვილს რამეზე ალერგია ხომ არ ჰქონდა.

საბავშვო ბაგა-ბაღების მართვის სააგენტოში აცხადებენ, რომ თუ აღმზრდელს ბრალდება დაუმტკიცდება, მის წინააღმდეგ ზომებს გაატარებენ.

შინაგან საქმეთა სამინისტროში გვითხრეს, რომ საქმეზე გამოძიება სისხლის სამართლის კოდექსის 126-ე მუხლის პირველი ნაწილის პრიმა მუხლით მიმდინარეობს, რაც არასრულწლოვანის მიმართ დანაშაულის ჩადენას გულისხმობს.