საქართველოს ყოფილმა პრეზიდენტმა, მიხეილ სააკაშვილმა გია ცერცვაძის საქმესთან დაკავშირებით, ტელეკომპანია რუსთავი 2-ის ეთერში განაცხადა, რომ მთელი ინფორმაცია მებრძოლებზე, რუსეთის მოთხოვნით, საქართველოს მთავრობამ გადასცა რუსეთს, მისივე განცხადებით, ასეთი მონაცემები ოფიციალური უწყებების გარდა არავის არ აქვს საქართველოში:

"გია ცერცვაძეს ვიცნობთ აქ, რადგან იგი ერთ-ერთი ყველაზე აქტიური მებრძოლი იყო 94-ე აერომობილურ დანაყოფთან ერთად შეიარაღებულ ძალებში და მონაწილეობდა მრავალ სპეცოპერაციაში ჯერ როგორც მებრძოლი, შემდეგ როგორც ინსტრუქტორი. გია აქტიურად მონაწილეობდა 2008 წლის ომში".

სააკაშვილის თქმით, დავით საყვარელიძე უკვე კონტაქტზეა უკრაინის გენერალურ პროკურორთან:

"მე იმედი მაქვს, რომ გიას გაუშვებენ. საკითხი ბევრად უფრო ღრმაა, ვიდრე ის, რაც ამ კონკრეტულ შემთხვევებში ხდება. მე ვიცი დანამდვილებით და ამაზე მაქვს ბევრი ინფრომაცია, რომ მთავარი დავალება, რომელიც აქვს წულუკიანს ივანიშვილისგან, ეს არის ჰააგის საერთაშორისო სასამართლოში ქართული მხარის გამტყუნება, ქართველი მებრძოლების გამტყუნება და ობიეტურ ჭეშმარიტებაში დახმარება კი არა, პირიქით, ქართული მხარის გამტყუნებაა. თეა წულუკიანი ამაზე მუშაობს ბოლო რამდენიმე წელია და გადადგა მთელი რიგი ნაბიჯები ამ მიმართულებით. თავის მხრივ ივანიშვილს დავალება აქვს თავის პატრონებისგან, კრემლიდან".