ნაციონალური მოძრაობის წევრი, სალომე სამადაშვილი ამბობს, რომ ერთპარტიული პარლამენტის შემთხვევაში პოლიტიკური პროცესი გაგრძელდება, თუმცა საკანონმდებლო ორგანოს გარეთ. გადაცემა პოლიტმეტრში მან განაცხადა, რომ ქართულ ოცნებას შეუძლია პიანისტ ელისო ბოლქვაძეს როიალი დაუდგან და "ამით შეიქციონ თავი".

პიანისტი ელისო ბოლქვაძე ქართული ოცნების პარტიული სიის 32-ე ნომერია. ის მეათე მოწვევის პარლამენტის დეპუტატი იქნება.

"პოლიტიკური პროცესი არამხოლოდ გაგრძელდება, გააქტიურდება. ეს იქნება, მათ შორის, ჩვენს საერთაშორისო პარტნიორებთან მუშაობა, ზეწოლა ხელისუფლებაზე, მათ შორის მათი მხრიდან, რომ მოლაპარაკებები გაგრძელდეს და შედეგს. ეს იქნება სავარაუდოდ მშვიდობიანი გამოსვლები, მანიფესტაციები და ა.შ. პოლიტიკური პროცესი იცოცხლებს, უბრალოდ, ეს პოლიტიკური პროცესი არ იქნება პარლამნეტში. მე არ ვიცი პარლამენტში რით დაკავდებიან, ქალბატონი ელისო ბოლქვაძე არის კარგი პიანისტი, დაუდგან როიალი და კონცერტები გამართონ და ამით შეიქციონ თავი, მაგრამ პოლიტიკური პროცესი პარლამენტში არ იქნება", — განაცხადა სამადაშვილმა.

მეათე მოწვევის პარლამენტის პირველი სხდომა 11 დეკემბერს არის ჩანიშნული. ოპოზიცია პარლამენტში შესვლას კვლავ არ აპირებს. შემჭიდროვებული ვადების პირობებში ელჩების შუამავლობის გრძელდება მოლაპარაკება ქართულ ოცნებასთანაც.

ორივე მხარე აცხადებს, რომ მათ აქვთ თანხვედრა საარჩევნო რეფორმებთან დაკავშირებით, თუმცა რიგგარეშე არჩევნების დანიშვნისა და პლებისციტის ჩატარების საკითხში კვლავ აზრთა სხვადასხვაობაა.