სტრატეგია აღმაშენებლის ლიდერის გიორგი ვაშაძის თქმით, დღვანდელი შეხვედრა არ გულისხმობს იმას, რომ ეს დასასრული იქნება. ამის შესახებ ვაშაძემ, აშშ-ის ელჩის რეზიდენციაში ხელისუფლების წარმომადგენლებსა და ოპოზიციის პარტიებს შორის მოლაპარაკების მესამე რაუნდის დაწყებამდე განაცხადა.

"ყველაფერი დამოკიდებულია შეხვედრაზე. ყველა საკითხზე ვისაუბრებთ. ჯერ ადრეა საუბარი რაიმე კომპრომისზე. ამ შეხვედრით არაფერი დასრულდება. იმედია, ამის ილუზია არავის აქვს",— განაცხადა ვაშაძემ.

საქართველოში აშშ-ის ელჩის, კელი დეგნანის რეზიდენციაში ხელისუფლების წარმომადგენლებსა და ოპოზიციას შორის საარჩევნო საკითხთან დაკავშირებით მოლაპარაკების მესამე რაუნდი ამ წუთებში მიმდინარეობს. შეხვედრას, რომელიც ცოტა ხნის წინ დაიწყო, ესწრებიან ფასილიტატორი ელჩები. ქართული ოცნების მხრიდან, პარტიის აღმასრულებელი მდივანი ირაკლი კობახიძე ესწრება.