მოქალაქეების ლიდერის, ალეკო ელისაშვილის თქმით, შეთანხმებულები არიან, რომ ხვალ მოლაპარაკებების მესამე რაუნდის შემდეგ, ყველა დეტალზე საჯაროდ ისაუბრებენ.

"ხვალ არის მოლაპარაკება და ვნახოთ, შეიძლება ისეთ სერიოზულ და გონივრულ კომპრომისზე წავიდეს ქართული ოცნება, ჩვენც ვთქვათ, რომ აგაშენებთ ღმერთი-თქო. ვნახოთ, არ გავუსწროთ მოვლენებს", — განაცხადა მან.

ოპოზიციური პარტიების წარმომადგენლები დღეს ლელოს ოფისში კიდევ ერთხელ შეიკრიბნენ. არსებობს ინფორმაცია, რომ ოპოზიციის შეთავაზებებს შორის არის პლებისციტიც ხელახალი არჩევნების შესახებ.

31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე და არ აპირებენ პარლამენტში შესვლას. პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიცია მოითხოვს ჩატარდეს რიგგარეშე არჩევნები, გათავისუფლდნენ პოლიტპატიმრები და გადადგეს ცენტრალური საარჩევნო კომისიის თავმჯდომარე, თამარ ჟვანია. ქართულ ოცნებაში ამბობენ, რომ რიგგარეშე არჩევნების ჩატარების საკითხი არ განიხილება.