რამდენიმე დღის წინ მაღაზია ზოომარტმა მიუსაფარი ცხოველებისთვის 10 ტონა მშრალი საკვები უფასოდ გამოყო და ის ცხოველთა მონიტორინგის სააგენტოს გადასცა. სააგენტომ გამოაცხადა საჭმლის გაცემის წესები და როგორც აღმოჩნდა, მსურველებმა ამ თვის მარაგი უკვე სრულად, პირველივე დღეს მიიღეს.

ცხოველთა მონიტორინგის სააგენტო ფეისბუქზე წერს, რომ 2 დეკემბერს დაწყებულ აქციას უამრავი ადამიანი გამოეხმაურა და საკვების 1 თვის მარაგი იმავე დღეს ამოიწურა. On.ge-ს სააგენტოს პრესსამსახურის თანამშრომელმა, ნატა უზუნაშვილმა უთხრა, რომ 20-20 კილოგრამებად განაწილებული 5 ტონა საკვები სულ 250 ადამიანზე გასცეს.

საკვების მეორე პარტიი დასარიგებლად, ცხოველთა მონიტორინგის სააგენტო სიას წინასწარ ადგენს. იმისთვის, რომ მიუსაფარი ცხოველისთვის საკვები მიიღოთ, სააგენტოს Facebook გვერდზე, პირად შეტყობინებებში უნდა მისწეროთ მიკედლების საბუთი, ან ცხოველთა სურათები და სხვა საჭირო მონაცემები, რითიც დაამტკიცებთ, რომ საკვები მიუსაფარი ცხოველების გამოსაკვებად გჭირდებათ.

"სია მოწერილი შეტყობინებების რიგითობის მიხედვით შედგება", — აცხადებენ სააგენტოში.

მიუსაფარი ცხოველებისთვის საკვების გაცემის აქცია ყოველდღიურად, მთელი კვირის განმავლობაში, პირველიდან ხუთ საათამდე უნდა გაგრძელებულიყო, თუმცა, როგორც ცხოველთა მონიტორინგის სააგენტოს თანამშრომელი ამბობს, მსურველები სათაო ოფისთან 2 დეკემბერს, დილის 9 საათიდან გამოჩნდნენ და გაცემა 7 საათამდე გაგრძელდა, რისი მიზეზიც, მისი სიტყვებით, პანდემიის დროს ხალხის დაყოვნების და მათი ერთად მოგროვების თავიდან არიდება იყო. ნატა უზუნაშვილი ასევე ამბობს, რომ მისული 250 კაციდან მიკედლების მოწმობა ყველას არ წარმოუდგენია.

"გადაწყდა, რომ მაქსიმალურად ბარიერების გარეშე გაგვეცა, ნაწილმა წარმოადგინა კიდეც მიკედლების საბუთი. სამი ადამიანი იდგა შესასვლელში, ერთი სიას ადგენდა, ერთი ამოწმებდა ინფორმაციას, რომ დარწმუნებულიყო რომ მათ მიკედლებული ჰყავდათ ცხოველები, ზოგმა ფოტოები გვაჩვენა, ზოგი ცხოველების სახელებს გვეუბნებოდა, ასაკოვნებიც მოვიდნენ", — ამბობს ის.