გულგრილობა #1

— უთხარი, მევასები, მაგარი გოგო ხარ და სიტუაცია თუ გაიჩითა, მიაწექი, რა უფრო. მაგათ [ქალებმა] თვითონ არ იციან, რა უნდათ...

გულგრილობა #2

— ვიფიქრე, პოლიციაში დავრეკო-მეთქი, მარა, რა ვიცი, უხერხული არ იყოს, უარეს ხათაბალაში არ გავხვიო.

— არ გინდა, არა, რა შენი საქმეა. ცოლ-ქმარი არიან, შერიგდებიან და იქით გისაყვედურებენ მერე...

გულგრილობა #3

— კარგი გადაუვლის, უარესებიც უქნია...უყვარხარ და გიყვარს...

ეს ფრაზები ამონარიდებია იმ აუდიოპიესებიდან, რომელიც ონლაინკამპანიის, გულგრილობის ვირუსი კლავს ფარგლებში მომზადდა და რომლის ავტორებიც ნესტან ნენე კვინიკაძე და ლაშა ბუღაძე არიან. კამპანია გაეროს ქალთა ორგანიზაციის ინიციატივითა და ევროკავშირის მხარდაჭერით, ქალთა მიმართ და ოჯახში ძალადობის წინააღმდეგ მიმდინარეობს.

პრინციპში, გვჭირდება პიესა, მოთხრობა ან რამე თვალსაჩინოება იმის დასანახად და იმაში დასარწმუნებლად, რომ ქალებზე ძალადობენ და ამ ძალადობაზე თვალს ვხუჭავთ? — კი, გვჭირდება. მიუხედავად იმისა, რომ, ხანდახან, ეს მეტისმეტად ცხადიც კია, მოსახლეობის 41 პროცენტი დღემდე მიიჩნევს, რომ ოჯახში ძალადობა ოჯახის საქმეა. მეტიც, ხშირად, იმასაც ფიქრობენ, რომ ოჯახში ან პარტნიორებს შორის მომხდარი კონფლიქტი ძალადობა არაა. ამის პარალელურად კი 2017 წელს ჩატარებული გაეროს ქალთა ორგანიზაციისა და საქსტატის ქალთა მიმართ ძალადობის ეროვნული კვლევის თანახმად, საქართველოში 7-დან ერთ ქალს ქმრის ან პარტნიორის მხრიდან ძალადობა გამოუცდია.

გულგრილობის ვირუსი კლავს — ეს კამპანია გენდერული ძალადობის წინააღმდეგ 16-დღიანი გლობალური აქტივიზმის ნაწილია. აუდიოპიესებისა და კამპანიის ერთ-ერთი მთავარი აქცენტი, ცნობიერების ამაღლების გაზრდაა საზოგადოებაში, რადგან მის სწორ რეაგირებას, ხშირად, ქალების სიცოცხლის გადარჩენა შეუძლია.

რა ხდება ახლა, როცა კორონავირუსით გამოწვეული შეზღუდვები ქალებს მოძალადის პირისპირ ერთ სივრცეში ტოვებს?

კორონავირუსით გამოწვეულმა შეზღუდვებმა და იზოლაციამ ქალებისა და გოგოების მიმართ ძალადობის საფრთხე კიდევ უფრო გაზარდა. გადაადგილების შეზღუდვისა და იზოლაციის დაწყებისთანავე ქალებისა და გოგოების მიმართ ყველა სახის ძალადობის, განსაკუთრებით კი ოჯახში ძალადობის შესახებ შეტყობინებების რაოდენობა გაიზარდა. სწორედ ახლა არის უფრო მეტად გაზრდილი საზოგადოების როლი და პასუხისმგებლობა. საზოგადოებაა ის, ვინც ამ სიტუაციაში გულგრილად არ უნდა დატოვოს ძალადობის შემთხვევები, რომლებიც მეზობლის, მეგობრის, თუ, უბრალოდ, ნაცნობის სახლის კარს მიღმა ხდება.

აღნიშნული კამპანია პროექტის "ქალებისა და გოგოების მიმართ ძალადობის წინააღმდეგ საქართველოში" ნაწილია, რომელსაც გაეროს ქალთა ორგანიზაცია გაეროს მოსახლეობის ფონდთან ერთად, ევროკავშირის ფინანსური მხარდაჭერით ახორციელებს. პროექტი ოჯახში და ქალთა მიმართ ძალადობის პრევენციისა და მასზე რეაგირებისთვის საჭირო პოლიტიკისა და კანონმდებლობის გამართვას, ასევე, შესაბამისი ინსტიტუციების შესაძლებლობების გაზრდას ემსახურება. გარდა ამისა, პროექტის მიზანი საზოგადოებაში არსებული ნეგატიური გენდერული სტერეოტიპების, სოციალური ნორმებისა და დამოკიდებულებების შეცვლა, ქალთა უფლებების მხარდაჭერა და გენდერული თანასწორობის ხელშეწყობაა.

გენდერული ძალადობის წინააღმდეგ 16-დღიანი საერთაშორისო კამპანია 1990-იანი წლების დასაწყისიდან აღინიშნება. იგი მიზნად საზოგადოებრივი ცნობიერების ამაღლებასა და გენდერული ძალადობის მსხვერპლთა მიმართ სოლიდარობის დემონსტრირებას ისახავს. წელს კამპანიის მთავარ აქცენტი ის "ჩრდილოვან პანდემიაა", რომელიც COVID-19-ის გავრცელებას მოჰყვა. გაეროს ქალთა ორგანიზაცია უერთდება ძალადობაგამოვლილ ადამიანებს, აქტივისტებს, გადაწყვეტილების მიმღებ პირებს, გაეროს სისტემასა და ყველა სოციალური ფენის წარმომადგენლებს, რათა უფრო ცხადად გამოკვეთოს, თუ რაოდენ საჭიროა დაფინანსება, აუცილებელი მომსახურებები, პრევენცია და მონაცემები, რომელთა მეშვეობით, ქალებისა და გოგოების მიმართ ძალადობაზე მეტად ინფორმირებული რეაგირება იქნება.

საქართველოს შინაგან საქმეთა სამინისტროს სტატისტიკის მიხედვით, 2020 წლის პირველ ექვს თვეში ოჯახში ძალადობის 2 607 შემთხვევა მოხდა, მათ შორის 11 მკვლელობით დასრულდა. 15 ივლისამდე პერიოდში 5 304 შემაკავებელი ორდერი გამოწერა.

კანონით შესაძლებელია, მოძალადე განარიდონ მსხვერპლის საცხოვრებელი ადგილიდან იმ შემთხვევაშიც, როდესაც საცხოვრებლის მესაკუთრე მოძალადეა. ასევე, შესაძლებელია მსხვერპლისა და მისი არასრულწლოვანი შვილის სახელმწიფო თავშესაფარში გადაყვანა.

ოჯახში ძალადობა არ გულისხმობს მხოლოდ ფიზიკურ შეხებას. ოჯახის წევრის მხრიდან ფსიქოლოგიური ზეწოლა, მუქარა, შანტაჟი, სიტყვიერი შეურაცხყოფა ასევე ოჯახური ძალადობაა და კანონით აკრძალულია.

ოჯახში ძალადობის შემთხვევაში პოლიციის გამოძახება შესაძლებელია 112-ზე დარეკვით. ზარი უფასოა. საკონსულტაციო მომსახურების გაწევის მიზნით ფუნქციონირებს ცხელი ხაზი: 116 006. შესაძლებელია 112-ის აპლიკაციის გადმოწერაც, სადაც ღილაკზე SOS დაჭერით პოლიციასთან შეტყობინება შევა და სამართალდამცველები ლოკაციის მიხედვით გიპოვიან. აღსანიშნავია ისიც, რომ არსებობს არაერთი არასამთავრობო ორგანიზაცია, რომლებიც ოჯახში ძალადობის მსხვერპლებს სხვადასხვა ტიპის დახმარებას უფასოდ სთავაზობენ.

გაიგეთ მეტი:

ტესტი: რა იცი ქალთა მიმართ ძალადობაზე