დაავადებათა კონტროლისა და საზოგადოებრივი ჯანდაცვის ეროვნული ცენტრის ხელმძღვანელის, ამირან გამყრელიძის განცხადებით, მომავალი ორი თვის განმავლობაში ანტიგენზე დამყარებული ტესტების გამოყენება გაფართოვდება.

"უწყებათაშორისი საკოორდინაციო საბჭოს გადაწყვეტილებაა, რომ შეზღუდვების პერიოდში გაფართოვდეს ხელმისაწვდომობა ადრეული იდენტიფიცირების მიზნით ტესტირებაზე. მოგეხსენებათ, ახალი გენერაციის, ანტიგენზე დამყარებული ტესტები, თითქმის, თუ სწორადაა გაკეთებული, იგივე შედეგს იძლევა, რაც ოქროს სტანდარტი — PCR ტესტი, ამიტომ არის რეკომენდაცია, რომ ისინი მაქსიმალურად გამოვიყენოთ", — განაცხადა ამირან გამყრელიძემ.

გამყრელიძის თქმით, გადაწყვეტილება მიღებულია და შესაბამისი დადგენილება მალე გამოიცემა.

"თუ დღეს დილით ჩვენ გვაქვს ჩატარებული 10 234 PCR ტესტი და დაახლოებით, 3 700-მდე ანტიგენზე დამყარებული სწრაფი ტესტი, ეს უნდა გაორმაგდეს. 20-დან 25 ათასის ფარგლებში უნდა ჩატარედეს ტესტირება, ანუ 10-11 ათასი PCR ტესტი და ერთი ამდენი კიდევ ანტიგენზე დამყარებული ტესტი", — აღნიშნა ამირან გამყრელიძემ.