სახალხო დამცველი ბორჯომის მუნიციპალიტეტის სოციალური პროგრამის მოთხოვნებს დისკრიმინაციულად აფასებს. პროგრამა ახალდაქორწინებულთა 150 ლარით წახალისებას გულისხმობს.

პროგრამაში ჩართვისთვის ახალდაქორწინებულებს მოეთხოვებათ, რომ წარადგინოს პირადობისა და ქორწინების მოწმობების ასლები და საბანკო ანგარიშის ნომერი. გარდა ამისა, აუცილებელ მოთხოვნას წარმოადგენს ქმრის რეგისტრაცია ბორჯომში.

ომბუდსმენი მიიჩნევს, რომ პროგრამა შესაძლოა ბორჯომის მუნიციპალიტეტში ახალდაქორწინებულთა ფინანსურ წახალისებას ემსახურებოდეს, ამიტომ მის მიზანშეწონილობას არ აფასებს.

თუმცა, მისი თქმით, ის ფაქტი, რომ ფულადი დახმარების მიღების წინაპირობა ქმრის ბორჯომში რეგისტრაციაა, დისკრიმინაციულია ამავე მუნიციპალიტეტში რეგისტრირებული ქალების მიმართ, რამდენადაც, მამაკაცებისგან განსხვავებით, მათი რეგისტრაციის ადგილს მნიშვნელობა არ ენიჭება.

ნანუაშვილი აცხადებს, რომ ბუნდოვანია, თუ რა ლეგიტიმური მიზანი განაპირობებს მსგავს განსხვავებულ მოპყრობას:

"მსგავსი მოთხოვნა, ხაზს უსვამს მამაკაცის დომინანტურობას ოჯახში და კიდევ უფრო ამყარებს საზოგადოებაში არსებულ სტერეოტიპებს ქალისა და მამაკაცის განსაზღვრული როლების შესახებ".

დისკრიმინაციის ყველა ფორმის აღმოფხვრის შესახებ საქართველოს კანონის მე-5 მუხლის ა პუნქტის თანახმად, დისკრიმინაციის აღმოსაფხვრელად ნებისმიერი დაწესებულება ვალდებულია, თავისი საქმიანობა, ანტიდისკრიმინაციულ კანონსა და სხვა ანტი-დისკრიმინაციულ კანონმდებლობას შეუსაბამოს.

სახალხო დამცველი მოუწოდებს ბორჯომის მუნიციპალიტეტს, გააუქმოს #2 ახალდაქორწინებულთა პროგრამით განსაზღვრული დისკრიმინაციული მოთხოვნა ქმრის რეგისტრაციის ადგილის შესახებ და მომავალი საქმიანობით ხელი შეუწყოს გენდერულ თანასწორობას რეგიონში.