მოქალაქეების ლიდერის ალეკო ელისაშვილის თქმით, თუ ქვეყანაში იქნება ნამდვილი პროკურორი და სასამართლო იქნება ნამდვილად სასამართლო, პარლამენტში "ქსოვრელებს" დაუძახებს და ისე შევა. ამის შესახებ მან პალიტრანიუსის ეთერში ისაუბრა.

"აბა შოთაძე არ იყოს პროკურორი და ნამდვილი პროკურორი იყოს და სასამართლო გავდეს სასამართლოს. ამის შემდეგ რას, არ უნდა დავთანხმდეთ იქ შესვლას, ასეთ რამეს თუ გამოვგლეჯთ ხელიდან? გირჩის მოსაზრება მისაღებია. თუ თავიდან ბოლომდე განხორციელდება ის, რაზეც ოპოზიციას ხელი გვაქვს მოწერილი, თუ გინდათ ქსოვრელებსაც დავუძახებ და ეგრე შევალთ", — განაცხადა ელისაშვილმა.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს და ბოიკოტი გამოუცხადეს არჩევნების მეორე ტურსაც, რომელიც 21 ნოემბერს ჩატარდა. მასში არცერთი ოპოზიციური პარტია მონაწილეობდა. 17 მაჟორიტარულ ოლქის გარდა, მეორე ტური გაიმართა ქუთაისის მერობის არჩევნებზეც. როგორც მოსალოდნელი, ოპოზიციის გარეშე ჩატარებულ არჩევნებში, სახელისუფლებო პარტიამ გაიმარჯვა.

მეორე ტური მიმდინარეობდა იმ ვითარების ფონზეც, რომ პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.