სისხლის სამართლის კოდექსს ცოლად მოყვანა, ან არ მოყვანა არ აინტერესებს და სამართლებრივი დევნა გაგრძელდება. ეს განცხადება საქართველოს განათლებისა და მეცნიერების მინისტრმა, ალექსანდრე ჯეჯელავამ მანდატურსა და სკოლის მოსწავლეს შორის, შესაძლო, სექსუალური კავშირის შესახებ გააკეთა.

მინისტრის თქმით, იმერეთში მომხდარმა ფაქტმა მანდატურის გუნდს ჩრდილი არ უნდა მიაყენოს.

„ძალიან სამწუხაროა ჩვენი საზოგადოების დამოკიდებულება ასეთ ადრეულ ასაკში ქორწინების მიმართ, რომელიც რჩება ტოლერანტური, რაც პრინციპში კარგი არ არის, რადგან ჩვენ, განათლებით, ოჯახებთან და საზოგადოებასთან მუშაობით უნდა შევეცადოთ, რომ დავანახოთ მიუღებელია ასეთ ადრეულ ასაკში ქორწინება, მისი ხელშეწყობა თუნდაც ოჯახის მხრიდან. მარწმუნებენ, რომ ყველა ბედნიერია ამ კონკრეტულ შემთხვევაში, თუმცა ჩვენ ნამდვილად არა ვართ ბედნიერი“ - აღნიშნა მინისტრმა.

რამდენიმე დღის წინ, იმერეთში, მანდატურის მიერ სკოლის მოსწავლესთან, შესაძლო, სექსუალური კავშირის შესახებ ინფორმაცია გავრცელდა. შსს-ს ინფორმაციით, ფაქტზე გამოძიება 140-ე მუხლით დაიწყო, რაც თექვსმეტი წლის ასაკს მიუღწეველთან სქესობრივი კავშირის ან სექსუალური ხასიათის სხვაგვარ მოქმედებას გულისხმობს.

On.ge-ს ინფორმაციით, მოზარდი ორსულადაა, ოჯახს მანდატურთან პრეტენზია არ აქვს და 40 წლის კაცი 15 წლის გოგოს ცოლად მოყვანას გეგმავს.