განათლების სამინისტრო On.ge-სთან საუბარში ადასტურებს, რომ იმერეთის რეგიონში მანდატურმა 15 წლის მოსწავლესთან სქესობრივი კავშირი დაამყარა.

სამინისტრო აცხადებს, რომ როგორც კი აღნიშნული მათთვის ცნობილი გახდა, მაშინვე სოციალური მომსახურების სააგენტოსა და შინაგან საქმეთა სამინისტროს აცნობეს. მათივე განცხადებით, მანდატური დეკემბრის თვიდან გათავისუფლებულია სამსახურიდან.

შსს-ში მომხდარზე გამოძიება სისხლის სამართლის კოდექსის 140-ე მუხლით დაიწყო, რაც თექვსმეტი წლის ასაკს მიუღწეველთან სქესობრივი კავშირის ან სექსუალური ხასიათის სხვაგვარ მოქმედებას გულისხმობს. დანაშაულის დამტკიცების შემთხვევაში მანდატურს 7-დან 9 წლამდე ვადით თავისუფლების აღკვეთა ემუქრება. შსს-ში განმარტავენ, რომ ამ დროისთვის საქმეზე საგამოძიებო მოქმედებები მიმდინარეობს.

On.ge-ს ინფორმაციით, 15 წლის მოზარდი ორსულადაა, ოჯახს მანდატურთან პრეტენზია არ აქვს და 40 წლის კაცი 15 წლის გოგოს ცოლად მოყვანას გეგმავს.