ერთ დღეს ცაში ბურთს ერთად გავაგორებთ — ასე გამოეხმაურა ბრაზილიელი ფეხბურთელი პელე, ლეგენდარული არგენტინელი ფეხბურთელის, დიეგო მარადონას გარდაცვალებას. მარადონას გარდაცვალებას ფეხბურთის სხვა ვარსკვლავებიც ეხმაურებიან.

"ძალიან სამწუხარო დღეა არგენტინისა და ყველა ფეხბურთელისთვის. ის გვტოვებს, მაგრამ არ მიდის, რადგან დიეგო მარადიულია", — თქვა მესიმ.

"დღეს მე მეგობარს ვემშვიდობები, სამყარო კი — მარადიულ გენიოსს; ყველა დროის ერთ-ერთ საუკეთესო, შეუდარებელ ჯადოქარს. ძალიან მალე წავიდა ჩვენგან, თუმცა უსაზღვრო მემკვიდრეობა და შეუვსებელი სიცარიელის განცდა დაგვიტოვა. მშვიდად განისვენე, ოსტატო. არასდროს დაგვავიწყდები", — დაწერა კრიშტიანუ რონალდუმ ტვიტერზე.

დღეს, 25 ნოემბერს ლეგენდარული არგენტინელი ფეხბურთელი, დიეგო მარადონა გარდაიცვალა. BBC-ის ინფორმაციით, ცნობილი ფეხბურთელი არგენტინის ქალაქ ტიგრეში გულის შეტევით 60 წლის ასაკში გარდაიცვალა.

ნოემბრის დასაწყისში უცხოურ მედიაში ვრცელდებოდა ინფორმაცია, რომ სპორტსმენმა თავის ტვინზე ოპერაცია გაიკეთა: მის ჯანმრთელობას თრომბი საფრთხეს უქმნიდა. ასევე, ცნობილი იყო, რომ მარადონა ალკოჰოლზე დამოკიდებულების გამო აქტიურ რეაბილიტაციას გადიოდა.

დიეგო მარადონა თავისი მრავალწლიანი კარიერის განმავლობაში თამაშობდა არგენტინის ეროვნულ ნაკრებში და ასევე ისეთ ცნობილ გუნდებში, როგორიცაა ესპანეთის ბარსელონა და იტალიის ნაპოლი.

მან თავი ყველას 1986 წელს მსოფლიო ჩემპიონატზე ინგლისის კარში გატანილი გოლით დაამახსოვრა, რამაც მის გუნდს მსოფლიო ჩემპიონის ტიტული მოუტანა. დიეგო მარადონა ყველა დროის ერთ-ერთ ყველაზე საუკეთესო ფეხბურთელად ითვლებოდა.