ცოტა ხნის წინ ცნობილი გახდა, რომ დღეს, 25 ნოემბერს ლეგენდარული არგენტინელი ფეხბურთელი, დიეგო მარადონა გარდაიცვალა.

BBC-ის ინფორმაციით, ცნობილი ფეხბურთელი არგენტინის ქალაქ ტიგრეში გულის შეტევით 60 წლის ასაკში გარდაიცვალა.

ნოემბრის დასაწყისში უცხოურ მედიაში ვრცელდებოდა ინფორმაცია, რომ სპორტსმენმა თავის ტვინზე ოპერაცია გაიკეთა: მის ჯანმრთელობას თრომბი საფრთხეს უქმნიდა.

ასევე ცნობილი იყო, რომ მარადონა ალკოჰოლზე დამოკიდებულების გამო აქტიურ რეაბილიტაციას გადიოდა.

სოციალურ ქსელებში ამ ფაქტს მისი გულშემატკივრები და ფეხბურთის ქომაგები ეხმიანებიან და ლეგენდას ემშვიდობებიან.

დიეგო მარადონა თავისი მრავალწლიანი კარიერის განმავლობაში თამაშობდა არგენტინის ეროვნულ ნაკრებში და ასევე ისეთ ცნობილ გუნდებში, როგორიცაა ესპანეთის ბარსელონა და იტალიის ნაპოლი.

მან თავი ყველას 1986 წელს მსოფლიო ჩემპიონატზე ინგლისის კარში გატანილი გოლით დაამახსოვრა, რამაც მის გუნდს მსოფლიო ჩემპიონის ტიტული მოუტანა.

დიეგო მარადონა ყველა დროის ერთ-ერთ ყველაზე საუკეთესო ფეხბურთელად ითვლებოდა.