ქართული ოცნების პარტიული სიის მეოთხე ნომერი და იუსტიციის ყოფილი მინისტრი, თეა წულუკიანი ამბობს, რომ მრავალპარტიული პარლამენტის ყველა საფუძველი არსებობს.

"რა თქმა უნდა, დავაკომპლექტებთ მთავრობას და ის ოპოზიციური პარტიები ან მათი წარმომადგენლები, ვინც პარლამენტში იქნებიან ჩვენთან ერთად. ამის არა მხოლოდ იმედი მაქვს, ამის ყველა საფუძველი და ნიშანი არსებობს, სწორედ იქ გაგვიწევენ, თუ ამის რაიმე არგუმენტი აქვთ, ოპონირებას და, რა თქმა უნდა, ჩვენ შევძლებთ ვაჩვენოთ ჩვენ ამომრჩეველს, ჩვენ ჩვენსას, მათ თავისას, რომ ეს ქვეყანა ვითარდება და არის დემოკრატია", — ამბობს წულუკიანი.

დღეს, 21 ნოემბერს 17 მაჟორიტარულ ოლქში არჩევნების მეორე ტური იმართება, რომელსაც ოპოზიცია ბოიკოტს უცხადებს. ბარიერგადალახულმა ოპოზიციურმა რვა პარტიამ მაჟორიტარული არჩევნების მეორე ტურში მონაწილეობაზე უარი თქვა და განაცხადა, რომ არც პარლამენტში შევა. ტექნიკურად მათი სახელები ბიულეტენებში ჩაწერილი იქნება, თუმცა, როგორც ოპოზიციაში ამბობენ, მათ არც საარჩევნო კამპანია ჩაუტარებიათ და საჯაროდაც მოქალაქეებს მოუწოდებენ, არ წავიდნენ არჩევნებზე.

არჩევნების დღეს ოპოზიცია აქციის ჩატარებას გეგმავდა, თუმცა საბოლოოდ მათ გადაწყვიტეს, რომ საპროტესტო ღონისძიებებს არ ჩაატარებდნენ და სრულ იგნორირებას გამოუცხადებდნენ.

ამ ხნის განმავლობაში მმართველ გუნდში ამტკიცებდნენ, რომ ოპოზიცია მეორე ტურისთვის კოორდინატორებისა და ამომრჩევლის მობილიზებას აპირებდა.

ამასთან, პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.