გლდანის მაჟორიტარობის კანდიდატი, ლევან კობიაშვილი ამბობს, რომ მაქსიმუმს გააკეთებს მეორე ტურში გამარჯვებისთვის, რომელსაც ოპოზიცია ბოიკოტს უცხადებს. მისი ოპონენტი გლდანის ოლქში ნაციონალური მოძრაობის ლიდერი, ნიკა მელიაა, რომელმაც პირველ ტურში კობიაშვილზე მეტი ხმა მოიპოვა.

"იქიდან გამომდინარე, რომ ყოფილი სპორტსმენი ვარ და ნებისმიერ ჩემ მოწინააღმდეგეს, ვინც არ უნდა იყოს, ყოველთვის ვცემ პატივს და ვაფასებ, რა საკვირველია, ისიც კარგად ვიცი, რომ პირველ ტურში ჩემზე მეტი ხმა აიღო, თუმცა ამას რა საკვირველია, თავისი გარემოებები ჰქონდა. მარგამ მე, როგორც ყოფილი სპორტსმენი და როგორც პარლამენტის მოქმედი წევრი, შესაბამისად მაქსიმუმს გავაკეთებ იმისთვის, რომ მეორე ტუში ჩვენ გავიმარჯვებთ", — განაცხადა კობიაშვილმა რუსთავი 2-ის ეთერში.

21 ნოემბერს მაჟორიტარი დეპუტატების არჩევისთვის მეორე ტური საქართველოს მასშტაბით 17 ოლქში გაიმართება: მთაწმინდა, კრწანისი; ვაკე; საბურთალო; ისანი; სამგორი; დიდუბე-ჩუღურეთი; ნაძალადევი; გლდანი; თელავი, ახმეტა, ყვარელი და ლაგოდეხი; მცხეთა, დუშეთი, თიანეთი და ყაზბეგი; რუსთავი, გარდაბანი; ხაშური, ქარელი; ზესტაფონი, ტყიბული, თერჯოლა, ბაღდათი; ქუთაისი; ზუგდიდი; ბათუმი; ხელვაჩაური, ქედა, შუახევი და ხულო.

პირველი ტურის შედეგებს ოპოზიცია არ აღიარებს და არჩევნების გაყალბებაზე საუბრობს. მათ მეორე ტურში მონაწილეობაზე უარი თქვეს და განაცხადეს, რომ არც პარლამენტში შევლენ. ტექნიკურად მათი სახელები ბიულეტენებში ჩაწერილი იქნება, თუმცა, როგორც ოპოზიციაში ამბობენ, მათ არც საარჩევნო კამპანია ჩაუტარებიათ და საჯაროდაც მოქალაქეებს მოუწოდებენ, არ წავიდნენ არჩევნებზე.

ამ ხნის განმავლობაში მმართველ გუნდში ამტკიცებდნენ, რომ ოპოზიცია მეორე ტურისთვის კოორდინატორებისა და ამომრჩევლის მობილიზებას აპირებდა.

ამავე თემაზე: