ევროპული საქართველოს ლიდერის, დავით ბაქრაძის განცხადებით, როგორც ფასილიტატორებს, ასევე ოპოზიციას ქვეყანაში არსებული კრიზისის განმუხტვა სურთ. მისი თქმით, ახლა "ბურთი და პასუხისმგებლობა" ქართული ოცნების მხარესაა და ოპოზიცია მათგან შემხვედრ წინადადებას ელის.

"დღეს გვქონდა კიდევ ერთი გულახდილი და ძალიან კარგი დისკუსია ჩვენს მეგობრებთან და პარტნიორებთან. შექმნილი ვითარება არის მარტივი, ოპოზიცია პასუხისმგებლობიდან გამოდმინარე ცდილობს, მოძებნოს გამოსავალი იმ პოლიტიკური კრიზისიდან, რომელშიც ქვეყანა შეიყვანა ხელისუფლებამ გაყალბებული არჩევნებით. ასეთი გამოსავლის მოძებნას ცდილობენ ჩვენი უცხოელი პარტნიორებიც. ჩვენ დღეს დეტალურად ვისაუბრეთ იმაზე, თუ რა შეიძლება იყოს გამოსვალი და საითკენ შეიძლება წავიდეს პროცესები კრიზისი განსამუხტად", — განაცხადა ბაქრაძემ.

არჩევნების მეორე ტურამდე ერთი დღით ადრე ელჩებმა ოპოზიციის წარმომადგენლებთან ინდივიდუალური შეხვედრების გამართვა დაიწყეს. მანამდე ელჩები პოლიტიკურ პარტიებთან საერთო შეხვედრებს აწყობდნენ.

არჩევნებთან დაკავშირებით პოლიტიკური პარტიების ლიდერები აშშ-სა და ევროკავშირის ელჩებს რამდენჯერმე შეხვდნენ. შეხვედრას ოპოზიციურ პარტიებთან ერთად ქართული ოცნებიდან, პარლამენტის თავმჯდომარე, არჩილ თალაკვაძეც ესწრებოდა. შეხვედრის დეტალებზე პოლიტიკოსები არ საუბრობენ, თუმცა აღნიშნავენ, რომ მხარეების პოზიციები უცვლელია.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ.