პარტია გირჩის ლიდერის, ზურაბ ჯაფარიძის განცხადებით, ელჩებთან მოლაპარაკება, შეიძლება, მესამე რაუნდისთვის მოსამზადებელ შეხვედრად ჩაითვალოს. მისი თქმით, ფასილიტატორები ცდილობენ, რომ ოპოზიციასა და ხელისუფლების პოზიციებს შორის დაახლოების წერტილები იპოვონ.

"კონკრეტული გზავნილები არ ყოფილა, იყო შეხვედრა, ჩავთვალოთ, რომ იყო მესამე რაუნდისთვის მოსამზადებელი წინასწარი შეხვედრა, სადაც ფასილიტატორები ცდილობენ, იპოვონ დაახლოების წერტილები ოპოზიციისა და ხელისუფლების პოზიციებს შორის. ჩვენი პოზიცია არ შეცვლილა არცერთ რაუნდზე, მათ შორის, არც ამ მოლაპარაკებაზე", — განაცხადა ჯაფარიძემ.

არჩევნების მეორე ტურამდე ერთი დღით ადრე ელჩებმა ოპოზიციის წარმომადგენლებთან ინდივიდუალური შეხვედრების გამართვა დაიწყეს. მანამდე ელჩები პოლიტიკურ პარტიებთან საერთო შეხვედრებს აწყობდნენ.

არჩევნებთან დაკავშირებით პოლიტიკური პარტიების ლიდერები აშშ-სა და ევროკავშირის ელჩებს რამდენჯერმე შეხვდნენ. შეხვედრას ოპოზიციურ პარტიებთან ერთად ქართული ოცნებიდან, პარლამენტის თავმჯდომარე, არჩილ თალაკვაძეც ესწრებოდა. შეხვედრის დეტალებზე პოლიტიკოსები არ საუბრობენ, თუმცა აღნიშნავენ, რომ მხარეების პოზიციები უცვლელია.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ.