Apple-მა დიდი ბრიტანეთის გაერთიანებულ სამეფოში App Store-ის ფასები 25 პროცენტით გაზარდა. მიზეზად Apple ბრექსიტის შედეგად გაუფასურებულ ფუნტ სტერლინგს ასახელებს. ინფორმაციას ამის შესახებ The Guardian ავრცელებს.

აპლიკაციები, რომლებიც აშშ-ში 0.99 დოლარი ღირს და ბრიტანეთში £0.79 ღირდა, ახლა 0.99 ფუნტი სტერლინგი ეღირება.

Apple-მა ფასების ცვლილება აპლიკაციების დეველოპერებს სამშაბათს, იმეილის საშუალებით შეატყობინა:

"როდესაც უცხოური სავალუტო კურსი, ან გადასახადები მოცულობა იცვლება, საჭირო ხდება App Store-ის ფასების განახლება."

ფასების მატება მოსალოდნელია Apple-ის სხვა პროდუქტებზე, მათ შორის iTunes Store მუსიკისა და ვიდეოსთვის და iBooks Store-ზე. ბრიტანეთი არ არის ერთადერთი ქვეყანა, რომელსაც ცვლილება შეეხო. ფასები მოიმატებს ინდოეთში, სერვისის გადასახადების მომატების გამო. ასევე, თურქეთში, ეროვნული ვალუტის გაუფასურების გამო.

მას შემდეგ, რაც ბრიტანეთის მოსახლეობამ ევროკავშირის დატოვებას მისცა ხმა, ფუნტი აშშ დოლართან მიმართებაში 18.5%-ით გაუფასურდა.