ქართული ოცნების წევრის, ანრი ოხანაშვილის თქმით, ხალხი, რომელიც დასავლურობაზე "თავს დებს", ამავდროულად, ამერიკის უმაღლესი თანამდებობის პირს აქციებს უმართავს. მისი განცხადებით, ეს ხაზს უსვამს იმას, რომ მსგავსი ინტერესების ირგვლივ გაერთიანებულ ჯგუფებს, დასავლეთი "არ უსმენს".

"ხალხი, რომელიც დასავლურობაზე, დემოკრატიაზე, დასავლეთთან თანამშრომლობაზე თავს დებს და ამავდროულად, აქციებს უმართავს უმაღლესი თანამდებობების პირს, გვინდა არ გვინდა, ეს იყო აქცია ამერიკისადმი და ამითი კიდევ ერთხელ ხაზი გაესვა იმას, რომ დასავლეთი ასეთ ჯგუფებს, ამ ინტერესების გარშემო გაერთიანებულს, არ უსმენს სათანადოდ და ეს დადასტურად იმით, რომ არ მომხდარა მათთან შეხვედრა. ამიტომ ეს სურათი თუკი ვინმეს აწყობს, არიან ის ძალები, რომლებიც ჩვენი ქვეყნის მიმართ არ არიან კეთილგანწყობილნი, ამიტომ არ შევუწყოთ მათ ხელი", — განაცხადა ოხანაშვილმა.

ამერიკის შეერთებული შტატების სახელმწიფო მდივანი, მაიკ პომპეო თბილისში 17 ნოემბერს საღამოს ჩამოფრინდა და ოფიციალური შეხვედრები დაიწყო. ის თბილისში 24 საათზე ნაკლები დარჩ და ქვეყანა 18 ნოემბერს დატოვა.

აშშ-ის სახელმწიფო მდივანი შეხვდა პრეზიდენტ სალომე ზურაბიშვილს, პრემიერმინისტრ გიორგი გახარიასა და პატრიარქ ილია მეორეს, თუმცა მედიასთან კომენტარები არ გაუკეთებია და მხოლოდ აშშ-ის საელჩოს განცხადებები გავრცელდა. ასევე, პომპეო შეხვდა არასამთავრობო ორგანიზაციებს. ცნობილია, რომ NGO-ებთან საუბრის ძირითადი თემა სასამართლოს დამოუკიდებლობა იყო.

შეხვედრა არ გამართულა ოპოზიციასთან. რამდენიმე პარტიის წარმომადგენლები სახელმწიფო მდივანს მდუმარე აქციით დახვდნენ. ვიზიტის დასრულების შემდეგ პომპეომ თავისი წარმომადგენელი დატოვა, რომელიც ოპოზიციის წევრებს შეხვდა.

გაიგეთ მეტი პომპეოს ვიზიტზე: