ევროპული საქართველოს ერთ-ერთი ლიდერი, გიგა ბოკერია ამბობს, რომ პარტიის პოზიცია ბოიკოტთან და ხელახალ არჩევნებთან დაკავშირებით არ იცვლება. ასე გამოეხმაურა იგი ამერიკის სახელმწიფო დეპარტამენტის შემაჯამებელ პრესკონფერენციას სახელმწიფო მდივნის, მაიკ პომპეოს საქართველოში ვიზიტის შემდეგ, სადაც ნათქვამია, რომ ბოიკოტი "იგივე ფილმის ყურებას ჰგავს".

"ევროპული საქართველოს პოზიციაში არაფერი არ იცვლება. ჩვენი პოზიცია არის მყარი და არაფერი არ შეიცვლება არც ბოიკოტთან და არც ახალ არჩევნებთან დაკავშირებით. ძალიან საყურადღებო იყო ის გზავნილი, რაც ჰქონდა ვიზიტისას მდივან პომპეოს, რა თემაც იყო მისთვის წუხილის საგანი. [...]

რაც შეეხება ტაქტიკურად რა გზა მიაჩნია ჩვენი მეგობარი ქვეყნის სახელმწიფო დეპარტამენტის წარმომადგენლის რომელიმე სპიკერს სწორად, ამ გადაწყვეტილებას ადგილზე იღებს ქართული საზოგადოება და ოპოზიცია. შეერთებული შტატები იმით განსხვავდება და თავისუფალი სამყაროს ლიდერი სწორედ იმიტომ არის, რომ ასე არ დგას საკითხი, რომ მიუთითონ რომელი გზა უფრო სწორია და ამაზე რაიმე მითითება, ან ინსტრუქცია მისცენ ვინმეს, ან მთავრობას, ან ოპოზიციას", — განაცხადა გიგა ბოკერიამ.

მისი თქმით, ივანიშვილის მიერ შექმნილი კრიზისის დაძლევა, მხოლოდ ხელახალი არჩევნებითაა შესაძლებელი.

ამერიკის სახელმწიფო დეპარტამენტმა მაიკ პომპეოს საქართველოში ვიზიტის შესაჯამებლად გამართულ პრესკონფერენციაზე საქართველოს არჩევნების შემდგომ ოპოზიციისა და მმართველი პარტიის ურთიერთობაზე ისაუბრა და აღნიშნა, რომ მნიშვნელოვანია ისინი მოლაპარაკებების მაგიდასთან დასხდნენ და ისწავლონ ერთად მუშაობა. ასევე ისაუბრეს არჩევნების დროს დაფიქსირებულ დარღვევებზე, რაც საქართველოსთვის ისეთივე პრობლემა იყო 2020 წლის საპარლამენტო არჩევნებზე, როგორიც იყო ბოლო დეკადების განმავლობაში.

მაიკ პომპეო თბილისში გუშინ, 17 ნოემბერს საღამოს ჩამოფრინდა და ოფიციალური შეხვედრები დღეს დაიწყო. აშშ-ის სახელმწიფო მდივანი შეხვდა პრეზიდენტ სალომე ზურაბიშვილს, პრემიერმინისტრ გიორგი გახარიასა და პატრიარქ ილია მეორეს, ასევე, არასამთავრობო ორგანიზაციებს. NGO-ებთან საუბრის ძირითადი თემა სწორედ სასამართლოს დამოუკიდებლობა იყო.

საპარლამენტო არჩევნები საქართველოში 31 ოქტომბერს ჩატარდა. ოპოზიცია შედეგებს არ აღიარებს და ბოიკოტის რეჟიმშია — ისინი პარლამენტში არ შედიან.

გაიგეთ მეტი: