ევროპული საქართველოს ლიდერის დავით ბაქრაძის თქმით, არ განიხილება პარლამენტში არშესვლის გადაწყვეტილების შეცვლა. ამის შესახებ მან ამერიკის სახელმწიფო დეპარტამენტის ევრაზიისა და ევროპის ხელმძღვანელთან შეხვედრის წინ განაცხადა.

"გარდა იმ ტრადიციული საკითხებისა რაც ძალინ მნიშვნელოვანია ქართულ-ამერიკულ ურთიერთობებში, კერძოდ ეს არის ტერიტორიული უსაფრთხოება, ნატოში გაწევრიანება. განხილვის მთავარი თემა იქნება შიდა პოლიტიკური კრიზისი, პოზიცია არის უცვლელი, არ განიხილება არშესვლის გადაწყვეტილების შეცვლა. ქვეყანაში არი კრიზისი, ქვეყანაში არის ნდობის დეფიციტი. ყველა ნორმალურ დემოკრატიულ სახელმწიფოში ნდობის კრიზისი გადასალახავად ტარდება არჩევნები. ჩვენს სტუმარს გავაცნობთ პოზიციას და მოვახერხებთ, რომ ჩვენს ამერიკელ მეგობრებთან გვქონდეს შეჯერებული და კოორდინირებული საუბარი. ვისაუბრებთ იმ უმძიმეს დარღვევებზე რამაც შექმნა კრიზისი, რამაც შეუძლებელი გახადა ოპოზიციის შეცვლა პარლამენტში", — განაცხადა ბაქრაძემ.

ამერიკის სახელმწიფო დეპარტამენტმა მაიკ პომპეოს საქართველოში ვიზიტის შესაჯამებლად გამართულ პრესკონფერენციაზე საქართველოს არჩევნების შემდგომ ოპოზიციისა და მმართველი პარტიის ურთიერთობაზე ისაუბრა და აღნიშნა, რომ მნიშვნელოვანია ისინი მოლაპარაკებების მაგიდასთან დასხდნენ და ისწავლონ ერთად მუშაობა. ასევე ისაუბრეს არჩევნების დროს დაფიქსირებულ დარღვევებზე, რაც საქართველოსთვის ისეთივე პრობლემა იყო 2020 წლის საპარლამენტო არჩევნებზე, როგორიც იყო ბოლო დეკადების განმავლობაში.

საპარლამენტო არჩევნები საქართველოში 31 ოქტომბერს ჩატარდა. ოპოზიცია შედეგებს არ აღიარებს და ბოიკოტის რეჟიმშია — ისინი პარლამენტში არ შედიან. გუშინ საქართველოს ამერიკის სახელმწიფო მდივანი, მაიკ პომპეო ეწვია, მან ხელისუფლების წარმომადგენლებთან, სამოქალაქო სექტორთან და პატრიარქთან შეხვედრები გამართა. პარალელურად მიმდინარეობდა ოპოზიციის მდუმარე აქციაც.