ერთიანი ნაციონალური მოძრაობის ლიდერის, ნიკა მელიას თქმით, ქართული ოცნება საკუთარ გამარჯვებაში დარწმუნებული არ არის და ამას სწორედ ის ფაქტი ადასტურებს, რომ "ოპონენტებზე ძალადობა გრძელდება". ამის შესახებ მელიამ მთავარი არხის ეთერში ისაუბრა.

"ქართული ოცნება ახლა ცდილობს, იმ რეჟიმში გამოანათონ, სადაც თავს მოიწონებენ ჩვენს უცხოელ კოლეგებთან, ხომ ხედავთ, თქვენთან ერთად ველაპარაკები ოპოზიციასო, დებატებიც გავმართეო. არაფერი მათ არ უშველით და დავაკვირდეთ, ახალი ტალღა ძალადობისა რაზე მიანიშნებს. შენ თუ გაიმარჯვე და არჩევნების შედეგებში დარწმუნებული ხარ და გჯერა, დამარცხებულზე რატომ ძალადობ? რატომ წვავენ ისევ შტაბებს?", — ამბობს მელია.

31 ოქტომბერს ჩატარებული საპარლამენტო არჩევნების შედეგებს ოპოზიცია არ ცნობს და საპარლამენტო მანდატებზე უარს აცხადებს. ოპოზიცია პერმანენტულ აქციებს აანონსებს, რამდენიმე აქცია უკვე ჩატარდა. კანდიდატები უარს აცხადებენ მეორე ტურში მონაწილეობაზეც.

ასევე, რამდენიმე დღის წინ, გლდანში ნიკა მელიას შტაბზე თავდასხმა მოხდა. ოფისს ქვები და, სავარაუდოდ, ე.წ მოლოტოვის კოქტეილები ესროლეს. ნიკა მელიამ დაასახელა რამდენიმე კონკრეტული გვარი, თუ ვის შეიძლება ეს თავდასხმა დაეორგანიზებინა, თუმცა მისივე თქმით, აღნიშნული პირები ჯერ არც დაუკითხავთ.