ტრიბუნას ოფისში ოპოზიცია შეიკრიბა, ბარიერს მიღმა დარჩენილი პარტიები კონტულტაციებს ერთიანი ნაციონალური მოძრაობის ერთ-ერთ ლიდერთან, ნიკა მელიასთან გადიან. შეხვედრას ესწრებიან პარტიები: სამართლიანობისთვის, ერთიანი ნაციონალური მოძრაობა, ტრიბუნა, თავისუფალი საქართველო, და ჩვენი საქართველო სოლიდარობის ალიანსი.

"ბიძინა ივანიშვილის არჩატარებულ არჩევნებში ვინ გადალახა და ვინ არ გადალახა ბარიერი, არასწორი იქნება ამის შეფასება, იმიტომ, რომ დაწერეს ადამიანებმა შედეგები. რამდენიმე ადამიანი დაჯდა და დაწერეს ის, რაც მათ სურდათ. მნიშვნელოვანია, რომ მთელი ოპოზიციური სპექტრი არის ერთიანი მოთხოვნაში და ეს მოთხოვნა არის, რომ მეათე მოწვევის პარლამენტი ვერ იქნება ლეგიტიმური. ყველა ოპოზიციური პარტია ვთანხმდებით, რომ ქვეყანაში კრიზისი განიმუხტება მხოლოდ მაშინ, როცა თუ ჩატარდება ახალი არჩევნები", — განაცხადა ერთიანი ნაციონალური მოძრაობის ერთ-ერთმა ლიდერმა, ნიკა მელიამ.

ტრიბუნას ლიდერის, დავით ჭიჭინაძის განცხადებით, პარტიებმა მიმდინარე პოლიტიკური პროცესები განიხილეს .

"განვიხილეთ მიმდინარე საკითხები, რასაც ყველანი განიხილავენ. რაც არის ახლა აქტუალური – არჩევნების არ აღიარება, ბოიკოტი და როგორ მიმდინარეობს სხვადასხვა პოლიტიკურ ორგანიზაციებში პროცესები. ისედაც აქტიურად ვართ ჩართულები, ყველა აქციაში ვმონაწილეობთ და გავაგრძელებთ აქტიურად", — აცხადებს ჭიჭინაძე.

პარტია სამართლიანობისთვის ლიდერი, ეკა ბესელია აღნიშნავს, რომ შეხვედრაზე საორგანიზაციო საკითხები განიხილეს, მათ შორის, ხვალინდელი პროტესტის ფორმაზეც იყო საუბარი.

"საორგანიზაციო შეხვედრა იყო უფრო მეტად. ვსაუბრობდით მიმდინარე პროცესებზე. აქცია, სადაც იქნება ცოცხალი ჯაჭვის შინაარსით ერთ-ერთი ყველაზე კარგად გამოხატული პროტესტის ფორმა და ვსაუბრობდით როგორც ხვალინდელ, ისე მიმდინარე პროცესებთან დაკავშირებით", — ამბობს ბესელია.

31 ოქტომბრის საპარლამენტო არჩევნების შედეგებს ოპიზიცია არ აღიარებს და ქუჩაში საპროტესტო აქციებს მართავს. პარტიებმა საკანონმდებლო ორგანოში შესვლაზე უარი უკვე თქვეს. ისინი აქციებს პერმანენტულ რეჟიმში მართავენ — მორიგი მდუმარე აქციაა დაგეგმილი ხვალ, როდესაც ოპოზიციური პარტიების წარმომადგენლები აშშ-ის სახელმწიფო მდივანს, მაიკ პომპეოს ვიზიტისას ცოცხალი ჯაჭვის მოწყობას აანონსებენ.