თბილისის მერის, კახა კალაძის თქმით, ნაციონალური მოძრაობის ერთ-ერთ ლიდერის, ნიკა მელიას განცხადება სამარცხვინოა.

"განცხადებას რაც შეეხება, სამარცხვინოს ვუწოდებდი. კონკრეტული კრიმინალის, უცხო ქვეყნის მოქალაქის, პოლიტიკური ავანტიურისტის, პირადი მოხმარების პარტიის უუფლებო წევრი, რომელიც აკეთებს ამ ტიპის და ამ შინაარსის განცხადებას, არის მხოლოდ და მხოლოდ სამარცხვინო. რასაც ისინი აკეთებდნენ, წარმოუდგენიათ და შეუძლიათ გააკეთონ, მათ ჰგონიათ, რომ იგივე სხვა რაღაცის გაკეთების შესაძლებლობა აქვს. ეს არის სამარცხვინო, ეს განცხადებები, რომელიც ჩვენ მოვისმინეთ", — განაცხადა კალაძემ.

ერთიანი ნაციონალური მოძრაობის ინფორმაციით, გამთენიისას გლდანში ნიკა მელიას შტაბზე თავდასხმა მოხდა. როგორც On.ge-ს მელიას შტაბის წევრმა განუცხადა, ოფისს ქვები და, სავარაუდოდ, ე.წ მოლოტოვის კოქტეილები ესროლეს.

ერთიანი ნაციონალური მოძრაობის ერთ-ერთმა ლიდერმა, ნიკა მელიამ განაცხადა, რომ მის შტაბზე თავდასხმა რევანშისტულ-მოძალადე ხელისუფლებამ თბილისის მერთან, კახა კალაძესთან და ქართული ოცნების მაჟორიტარობის კანდიდატთან, ლევან კობიაშვილთან დაახლოებული პირების საშუალებით მოახდინა.