ცენტრალური საარჩევნო კომისიის სხდომაზე კომისიის წევრ დავით კირთაძესა და კომისიის თავმჯდომარე თამარ ჟვანიას შორის სიტყვიერი შელაპარაკება მოხდა. დავით კირთაძე ჟვანიასგან განცხადების დაწერასა და თანამდებობის დატოვებას მოითხოვდა და ეკითხებოდა, რა მორალით რჩებოდა დაკავებულ თანამდებობაზე, რაზეც ჟვანიამ უპასუხა, რომ სირცხვილია, როცა დავით კირთაძე ვიღაცას მორალს უკითხავს.

"ხალხის ხმა რომ არ გესმით, ზუსტად ეს არის თქვენი პრობლემა", — მიმართა კირთაძემ თამარ ჟვანიას.

ამაზე კი ჟვანიამ უთხრა, რომ კირთაძეს სხდომის არევა უნდოდა, მისი შეშინებული არავინ უნახავს და ნურც ახლა აშინებს ნურავის. ასევე, კირთაძის განმეორებითი მოთხოვნა, რომ თანამდებობა დაეტოვებინა, ჟვანიამ მუქარად შეაფასა.

"ეგ არის შანტაჟი, ეგ არის მუქარა, ან გაჩუმდები, ან გახვალ გარეთ", — განაცხადა თამარ ჟვანიამ დავით კირთაძის მისამართით.

კამათის ბოლოსკენ კი თამარ ჟვანიამ კირთაძეს ურჩია, რომ საკუთარი მოთხოვნა თავისთვის შეენახა.