თბილისში, თამარაშვილის ქუჩაზე ხანძარი ლიკვიდირებულია. საცხოვრებელ სახლში შესულ მეხანძრე მაშველებს ერთი გარდაცვლილი დახვდათ. ხანძრის გავრცელების საშიშროების გამო, მეზობლების სახლიდან გამოყვანა მოხდა. ამის შესახებ, საგანგებო სიტუაციების მართვის სამსახურის თბილისის მთავარი სამმართველოს უფროსმა, ოთარ კერესელიძემ განაცხადა.

"თამარაშვილის ქუჩაზე საცხოვრებელ კორპუსში მეექვსე სართულზე გაჩნდა ხანძარი, მობილიზებული იყო 4 სახანძრო სამაშველო სამსახური, როდესაც სამაშველო სამსახური ბინაში შევიდა ერთ კაცის ცხედარი დახვდათ, სხვა ადამიანები სახლში არ ყოფილან, ხანძრის გავრცელების საშიშროება იყო, შესაბამისად მოხდა მეზობლების გარეთ გამოყვანა. ხანძრის გამომწვევი მიზეზები, ჯერჯერობით, უცნობია", — განაცხადა ოთარ კერესელიძემ.

მეზობლების თქმით, ხმაური გაიგეს და შემდეგ დიდი კვამლი შეამჩნიეს. ისინი ამბობენ, რომ გარდაცვლილი 70 წლამდე კაცია. ის ბინაში მეუღლესთან ერთად ცხოვრობდა. ხანძრის გაჩენის დროს კი მეუღლე გარეთ იმყოფებოდა.