სასამართლომ სირცხვილიას აქტივისტ გიორგი მჟავანაძეს 3-დღიანი პატიმრობა შეუფარდა, ნოდარ რუხაძეს კი 1500-ლარიანი ჯარიმა დააკისრა. ინფორმაცია On.ge-ს ადვოკატმა, ედუარდ მარიკაშვილმა დაუდასტურა.

ნოდარ რუხაძე და გიორგი მჟავანაძე 9 ნოემბერს პარლამენტის წინ აქციაზე დააკავეს. აქციაზე დაკავებულ კიდევ ერთ აქტივისტს, ლექსო მაჭავარიანს სასამართლომ 1 000-ლარიანი ჯარიმა დააკისრა.

9 ნოემბრის აქციაზე სამივეს მიმართ შედგა სამართალდარღვევის ოქმი, ადმინისტრაციულ სამართალდარღვევათა კოდექსის 166-ე და 173-ე მუხლებით, რაც წვრილმან ხულიგნობასა და პოლიციის კანონიერი განკარგულებისადმი ან მოთხოვნისადმი დაუმორჩილებლობას გულისხმობს.

როგორც აქტივისტები აცხადებენ, ისინი რუსთაველის გამზირზე შეშის მიტანისთვის დააკავეს. მჟავანაძის ადვოკატის ინფორმაციით, დაკავებისას მასზე იძალადეს.

მოძრაობა სირცხვილიამ გადაადგილების შეზღუდვა 9 ნოემბერს გააპროტესტა და საღამოს 10 საათიდან დილის 5 საათამდე საპროტესტო აქცია გამართა. მათ შეზღუდვებს "დაუმორჩილებლობა" გამოუცხადეს.

საკოორდინაციო საბჭოს გადაწყვეტილებით, 9 ნოემბრიდან დიდ ქალაქებში: თბილისში, ბათუმში, ქუთაისში, რუსთავში, ზუგდიდში, გორსა და ფოთში 22 საათიდან დილის 5 საათამდე გადაადგილება შეიზღუდა. შეზღუდვა ვრცელდება როგორც ქვეითად, ისე ტრანსპორტით და კერძო ავტომობილებით მოსიარულეებზე.