ნაციონალური მოძრაობის ერთ-ერთმა ლიდერმა, ზაალ უდუმაშვილმა განაცხადა, რომ უმჯობესი იქნება, თუ მაიკ პომპეო უშუალოდ ოპოზიციისგან მოისმენს თუ რა ვითარებაა ქვეყანაში.

"განსაკუთრებით მნიშვნელოვანია არა მხოლოდ, ჩვენთვის, ოპოზიციისთვის, არამედ მთლიანად საზოგადოებისთვის, რა გზავნილები ექნება შეერთებული შტატების სახელმწიფო მდივანს. რაც შეეხებაა შეხვედრებს, ჯერჯერობით რაც წავიკითხე, შეხვედრები არის ხელისუფლებასთან, თუმცა, როდესაც ასეთი რანგის დიპლომატი ჩამოდის, ის ძალიან კარგად არის ინფორმირებული, ზოგადად, ქვეყანაში არსებულ ვითარებაზე, მათ შორის, ოპოზიციის პოზიციაზეც ამ საკითხთან დაკავშირებით. თუმცა, რა თქმა უნდა, უმჯობესი იქნება, თუ სახელმწიფო მდივანი უშუალოდ ოპოზიციისგან მოისმენს, თუ რა ვითარებაა ქვეყანაში", — განაცხადა უდუმაშვილმა.

აშშ-ს სახელმწიფო მდივანი, მაიკ პომპეო 17-18 ნოემბერს საქართველოში ჩამოდის. ვიზიტის ფარგლებში ის შეხვედრებს გამართავს პრემიერმინისტრ გიორგი გახარიასთან, საქართველოს პრეზიდენტთან სალომე ზურაბიშვილთან და საგარეო საქმეთა მინისტრ დავით ზალკალიანთან. მაიკ პომპეო თბილისში, ასევე, შეხვდება სრულიად საქართველოს კათოლიკოს-პატრიარქ ილია II-ეს.