ოდესმე გიფიქრიათ, სად დაძრწის თქვენი კატა, როცა ის სახლიდან გადის?

ირლანდიელმა აოიფ მაკალირმა გადაწყვიტა, გაერკვია, რას აკეთებდა მისი კატა ჯაგერი, როცა ქუჩაში გადიოდა სახეტიალოდ, ამიტომაც მან GPS-ის მქონე საყელო იყიდა და თავის კატას გაუკეთა. და მართალია, ეს მშვენიერი გზაა საიმისოდ, რომ ჩვენს ფუმფულა მეგობარს მივაგნოთ მაშინ, როცა ის სახლიდან გაიქცევა, მაგრამ კატის პირად სივრცეში ასეთმა შეჭრამ პატრონს საკმაოდ მოულოდნელი აღმოჩენა გააკეთებინა.

ფოტო: eefskol / TikTok

როგორც გაირკვა, ჯაგერი ზედმეტად ჭკვიანია საიმისოდ, რომ საკვები და სასუსნავები მხოლოდ ერთი პატრონისგან მიიღოს. 24 საათის განმავლობაში კატამ ხუთი სხვადასხვა სახლი მოინახულა, შემდეგ კი შინ ისე დაბრუნდა, ვითომც არაფერი — თუმცა, ამჯერად ის გამოიჭირეს.

ჯაგერის თავგადასავლები მალევე ინტერნეტში გამოიჭიმა და შეუმჩნეველიც არ დარჩა. მაკალირმა თავისი პატარა ექსპერიმენტის ვიდეო TikTok-ზე დადო და ის სწრაფადვე იქცა ვირუსულ კონტენტად:

@eefskol

So not sure if genius or invasion of privacy 😂but I am entertained #cat #catlover #catsoftiktok #fyou #justdidagoodthing #fyp

♬ just did a good thing - lucaselvis

"საყელომ იმის საშუალება მომცა, რომ მენახა, სად დადიოდა ჩემი კატა. ვიცოდი, რომ მეზობლად არსებულ ორ სახლს სტუმრობდა ხოლმე და მეპატრონეებს მისი დანახვა ძალიან უხაროდათ. საინტერესო იყო, დანარჩენ 2 სახლშიც თუ მიდიოდა", — თქვა კატების მეპატრონემ.

ჯაგერი 6 წლის ველური კატა იყო, როცა ის აიყვანეს. ფისო მალევე გახდა ოჯახის ნაწილი, თუმცა გარეთ ხეტიალი მაინც ძალიან უყვარს და ყოველდღიურად გადის სასეირნოდ, საღამოობით კი თავის მზრუნველ პატრონთან ბრუნდება შინ.

ფოტო: eefskol / TikTok