საქართველოს საგარეო საქმეთა მინისტრ დავით ზალკალიანის განცხადებით, 2020 წლის 10 ნოემბერს ცნობილი გახდა, რომ ამერიკის შეერთებულმა შტატებმა საქართველოს დასახმარებლად 132 მილიონ აშშ დოლარი გამოყო.

ზალკალიანის თქმით, აშშ-ს საბიუჯეტო კანონის სენატის წარდგენილი კანონპროექტის თანახმად, ამავე ქვეთავში მოქცეულია საქართველოს მხარდამჭერი გზავნილი. კერძოდ, საქართველოს ტერიტორიების, აფხაზეთისა და ცხინვალის რეგიონის ოკუპაცია, რომლის თანახმადაც, კანონით გამოყოფილი ფინანსებით ვერ ისარგებლებს იმ სახელმწიფოს ცენტრალური მთავრობა, რომელთა მიმართებაშიც აშშ-ს სახელმწიფო მდივანი დაადგენს და შესაბამის კომიტეტს წარუდგენს ანგარიშს, რომ ამ ქვეყანამ აღიარა რუსეთის მიერ ოკუპირებული აფხაზეთისა და ცხინვალის რეგიონის დამოუკიდებლობა, ან მათთან რაიმე სახის ურთიერთობები დაამყარა.

"კანონპროექტი ძალიან მნიშვნელოვან ტენდენციებს ცხადჰყოფს. პირველი, საქართველოსთან დაკავშირებული საკითხი აშშ-ს საკანონმდებლო პროცესის განუყოფელი ნაწილია და ჩვენს ქვეყანასთან ურთიერთობა ამერიკის საგარეო პოლიტიკის დღის წესრიგის ერთ-ერთი მნიშვნელოვანი მიმართულებაა. საქართველოს სუვერენიტეტი და ტერიტორიული მთლიანობა და ჩვენი ქვეყნის უსაფრთხოება მთლიანად ევროპის უსაფრთხოების ნაწილს წარმოადგენს", — განაცხადა ზალკალიანმა.

მისივე თქმით, ბოლო 4 წელიწადში საქართველოსადმი ფინანსური მხარდაჭერა 50 მილიონით გაიზრდა. ზალკალიანის განცხადებით, სენატის ასიგნების კომიტეტის მიერ დამტკიცებულ კანონპროექტში არ არის ის დათქმა, რომელიც 15%-იან შეზღუდვასთან იყო დაკავშირებული, რომელიც არსებობდა კანონის წარმომადგენლობითი პალატის მიერ 2020 წლის 24 ივნისის მიღებულ ვერსიაში. საგარეო საქმეთა მინისტრის შეფასებით, ეს კიდევ ერთხელ ადასტურებს იმას, რომ საქართველოს დემოკრატიული მიმართულების უმნიშვნელოვანესი პროგრესი არსებობს.

17-18 ნოემბერს აშშ-ის სახელმწიფო მდივანი, მაიკ პომპეო საქართველოში ჩამოვა. ზალკალიანის განცხადებით, აშშ-ის სახელმწიფო მდივნის, მაიკ პომპეო საქართველოში ვიზიტი აშშ-ის ადმინისტრაციის მხრიდან პოლიტიკური მხარდაჭერის მკაფიო ნიშანს წარმოადგენს.

ვიზიტის ფარგლებში სახელმწიფო მდივანი შეხვედრებს გამართავს პრემიერმინისტრ გიორგი გახარიასთან, საქართველოს პრეზიდენტთან სალომე ზურაბიშვილთან და საგარეო საქმეთა მინისტრ დავით ზალკალიანთან. მაიკ პომპეო თბილისში, ასევე, შეხვდება სრულიად საქართველოს კათოლიკოს-პატრიარქ ილია II-ეს.

ვიზიტის ფარგლებში გამართული შეხვედრებისას მხარეები განიხილავენ საქართველოსა და რეგიონში არსებული უსაფრთხოების გარემოს და ქვეყნებს შორის თანამშრომლობას რეგიონული და საერთაშორისო უსაფრთხოების განმტკიცების მიზნით. მხარეები, ასევე, განიხილავენ საქართველოში მიმდინარე დემოკრატიულ და ეკონომიკურ რეფორმებს.