ქუთაისის ცენტრში მაკდონალდსის რესტორნის აშენება იგეგმება. ტერიტორია, სადაც რესტორანი უკვე განთავსდეს რამდენიმე დღის წინ შემოღობეს, თუმცა ქალაქში სწრაფი კვების რესტორნის მშენებლობას მოწინააღმდეგეები გამოუჩნდნენ. მათ შორის არიან სასულიერო პირები.

ადგილობრივი გამოცემა ქუთაისი პოსტის ინფორმაციით, მღვდლები აცხადებდნენ, რომ იმ ტერიტორიაზე, სადაც მაკდონალდსის აშენება იგეგმება, ეკლესია უნდა აშენებულიყო.

ისინი 12 იანვარს შეხვდნენ ქუთაისის მერს შოთა მურღულიას, რომელიც მათ დაჰპირდა, რომ ეკონომიკის სამინისტროსთან შუამდგომლობას გაუწევდა.

გაენათის ეპარქიას ეკლესიის ასაშენებლად მაკდონალდსისთვის გამოყოფილი ადგილი იმ შემთხვევაში გადაეცემოდა, თუ ასეთ გადაწყვეტილებას ეკონომიკის სამინისტრო მიიღებდა.

მაკდონალდსის მშენებლობისთვის უნდა გადაადგილდეს საათიც, რომელიც ქალაქის ცენტრშია და ქუთაისის მთავარი საათი და ქუჩის საათი ჰქვია.

ასევე ფორმირდება კიბეც და დარჩება მხოლოდ მისი ნაწილი.

როგორც ადგილობრივი ტელევიზია რიონი იუწყება, ქუთაისში ცენტრალურ მოედანზე მაკდონალდსის მშენებლობის საკითხთან დაკავშირებით საბოლოო დეტალებს კულტურული მემკვიდრეობის სააგენტო დაადგენს.

მაკდონალდსის წარმომადგენლებმა აღნიშნული ტერიტორია გასულ წელს შეიძინეს. მშენებლობის დასრულება 6 თვეში იგეგმება.

დღეს ადგილობრივების მცირე ნაწილმა მაკდონალდსის მშენებლობა აქციით გააპროტესტეს. როგორც ქუთაისი პოსტი წერს, მოქალაქეები მიიჩნევენ, რომ რესტორანი ქალაქის იერსახეს დაამახინჯებს, მათთვის ასევე მიუღებელია მოედანზე არსებული საათის გადატანა.

აქციას უერთდება პარტია თავისუფალი საქართველოს წარმომადგენელი გოგი წულაია და შუშების ჩამტვრევით იმუქრება და აცხადებს, რომ მიწის გაყიდვა ხალხს არ შეუთანხმეს:

"ყველასთან შეუთანხმებლად, ფულების შოვნაზე გადასულმა ხალხმა გაყიდა მიწა. ერთხელ უკვე დაგვიმახინჯეს ქალაქი ჭავჭავაძის ქუჩაზე არსებული მაკდონალდსის სახით და ახლა მეორედ გვაფურთხებენ სულში. დღეს ბანერი ჩამოვხიე და ხვალ შუშებს ჩავამტვრევ".

ქუთაისი პოსტის მიერ ჩატარებულ გამოკითხვაში მონაწილეები ამბობენ, რომ ქალაქის ცენტრში მაკდონალდსის ნაცვლად ეკლესიის აშენებას ამჯობინებენ:

მაკდონალდს კომპანია ელემენტ კონსტრაქშენი აშენებს. მისი წარმომადგენლის თქმით, რესტორნის ავტოსადგომი და საზაფხულო ტერასა მეორე იარუსზე მოეწყობა, ხოლო ზედა, მესამე იარუსზე დავით აღმაშენებლის სახელობის ტაძარი აშენდება.