დღეს, 18 მაისს, ეროვნულმა ფორუმმა საგანგებო ბრიფინგი გამართა და პრეზიდენტს სთხოვა, გამოიყენოს კონსტიტუციით მისთვის მინიჭებული უფლება და ე.წ. კაბელების საქმეში მსჯავრდებული 5 პირი შეიწყალოს.

ფრაქციის ლიდერმა, კახა შარტავამ აღნიშნა, რომ ეროვნული ფორუმის იურისტებისა და დამოუკიდებელი ექსპერტების აზრით, 16 მაისს ე.წ. კაბელების საქმეზე მოსამართლე ბუგიანიშვილის მიერ გამოტანილი განაჩენი მსჯავრდებულთა უდანაშაულობას უფრო მიანიშნებს, ვიდრე მათ ბრალეულობას. მისი თქმით, დაინტერესებულ მხარეთა ჩართულობა პროცესს პოლიტიკურ შინაარსს აძლევს, რამაც შეიძლება ისედაც ყოველთვის რთულ წინასაარჩევნო პერიოდს დამატებითი სიმწვავე შესძინოს:

"სასამართლო სისტემაში არსებული პრობლემების გათვალისწინებით, მომდევნო ინსტანციების იმედიც ნაკლებად რჩება. ჩვენ, ეროვნული ფორუმი, მივმართავთ თხოვნით საქართველოს პრეზიდენტს გამოყენოს საქართველოს კონსტიტუციითა და კანონმდებლობით მინიჭებული უფლება და შეიწყალოს მსჯავრდებულები".

ე.წ. კაბელების საქმეზე ბრალდებული თავდაცვის სამინისტროს თანამშრომლები ნუგზარ კაიშაური, დავით წიფურია, არჩილ ალავიძე, გიორგი ლობჟანიძე და გიზო ღლონტი თბილისის საქალაქო სასამართლოს მოსამართლე ბესიკ ბუგიანიშვილმა დამნაშავედ ცნო და მათ 7-წლიანი პატიმრობა მიუსაჯა.

პროკურატურა დაკავებულებს სახელმწიფოს კუთვნილი 4 მილიონის გაფლანგვას ედავება, რასაც ბრალდებულები არ ეთანხმებიან და საქმეს პოლიტიკურად მოტივირებულს უწოდებენ. თავის მხრივ, პროკურატურა მიიჩნევს, რომ სასამართლომ ადეკვატური და მტკიცებულებებზე დამყარებული გადაწყვეტილება მიიღო.