ევროკომისიის პრეზიდენტის, ურსულა ფონ დერ ლეიენის განცხადებით, ევროკავშირი მზადაა ამერიკის შეერთებულ შტატების ახალ ადმინისტრაციასთან თანამშრომლობის გასაღრმავებლად.

"ევროკავშირი და ამერიკის შეერთებული შტატები არიან მეგობრები და მოკავშირეები, ჩვენი მოქალაქეები იზიარებენ ღრმა კავშირებს, შესაბამისად, ამერიკის შეერთებულ შტატებში პრეზიდენტის არჩევა წარმოადგენს მნიშვნელოვან მომენტს ატლანტის ოკეანის მეორე მხარეზეც. ჩვენ, ყველა, ვადევნებდით თვალს საარჩევნო პროცესს და ცხადია, რომ ქვეყნის შემდეგი პრეზიდენტი ჯო ბაიდენია. მე ვულოცავ მას და ვიცე-პრეზიდენტს, კამალა ჰარისს", — განაცხადა ლეიენმა.

მისივე განცხადებით, მსოფლიოს დღის წესრიგში აღმოცენებული ცვლილებების, გამოწვევებისა და შესაძლებლობების ფონზე, აუცილებელია, აშშ-მ და ევროკავშირმა თანამშრომლობა გააგრძელონ.

"მსოფლიო წესრიგის ცვლილებებისა და გამოწვევების გამოჩენის პარალელურად, ჩვენი განახლებული გლობალური პარტნიორობა კრიტიკული იქნება. ევროკავშირი მზადაა, გააძლიეროს თანამშროლობა თეთრი სახლის ახალ ადმინისტრაციასთან და ახალ კონგრესთან", — განაცხადა ლეიენმა.

წინასწარი მონაცემებით, ჯო ბაიდენი აშშ-ის 46-ე პრეზიდენტი გახდა, კამალა ჰარისი კი აშშ-ს ისტორიაში პირველი ვიცე-პრეზიდენტი ქალია. ბაიდენს გამარჯვება მიულოცა არაერთმა მსოფლიო ლიდერმა და ის არჩეულ პრეზიდენტად მოიხსენია. ამის ფონზე ტრამპი თავს გამარჯვებულად მიიჩნევს და შედეგებს არ აღიარებს.

დონალდ ტრამპი გახდა პირველი პრეზიდენტი 1992 წლის შემდეგ, რომელიც ამერიკელმა ხალხმა ხელმეორედ აღარ აირჩია.

გაიგეთ მეტი ჯო ბაიდენზე: