ექსპრეზიდენტმა, გიორგი მარგველაშვილმა რუსთაველზე მიმდინარე აქციიდან საერთაშორისო პარტნიორებს მიმართა და მოუწოდა, რომ "დროზე დადგნენ" ქართველი ხალხის გვერდით. მისი თქმით, როდესაც ქართველი ხალხის მოთმინება ივსება, ისინი ყოველთვის აღწევენ გამაჯრვებას.

"მე მინდა მივმართო ჩვენს უცხოელ პარტნიორებს, მადლობა თანადგომისთვის და მე მინდა, ერთი რამე გითხრათ: მე ვიცნობ ქართულ საზოგადოებას და ქართველ ერს, თქვენც იცნობთ, მაგრამ, ალბათ, მე უკეთესად ვიცნობ. და ეს იცოდეთ, როდესაც რუსთაველი ასე ივსება და როცა ქართველი ერის მოთმინების ფიალა ივსება, არ ყოფილა, რომ ამ ხალხს გამარჯვებისთვის არ მიეღწიოს და დროზე დადექით ამ ხალხის გვერდით", — განაცხადა მარგველაშვილმა.

ამ წუთებში პარლამენტის წინ წარსულში ერთმანეთთან დაპირისპირებული ოპოზიციური პარტიები საერთო აქციას მართავენ და არჩევნების შედეგებს აპროტესტებენ.

ოპოზიციური პარტიები არჩევნების შედეგებს არ აღიარებენ და არალეგიტიმურად ცნობენ. ყველა ბარიერგადალახულმა პარტიამ უარი თქვა მეორე ტურში მონაწილეობასა და პარტლამენტის მანდატებზე.

არჩევნების შემდეგ, როცა ოპოზიციამ აქციები დაანონსა, სამთავრობო გუნდი და საკოორდინაციო საბჭოს წევრები უფრო მკაცრად აცხადებენ, რომ აქციები ვირუსის გავრცელების საფრთხეს შეიცავს და მოუწოდებენ მოქალაქეებსა და პოლიტიკურ ლიდერებს დაიცვან წესები.