ფეისბუკის მომხმარებელმა გიორგი ქალდანმა, მესტიიდან, ატვირთა ვიდეო, რომელშიც ჩანს რომ ორი "მეტისი" ძაღლი ერთმანეთს ეჩხუბება.

ცხოველების ჩხუბს რამდენიმე ათეული კაცი ესწრება, ისინი ხმამაღალი შეძახილებით აქეზებენ ძაღლებს. ისმის შეძახილები: "მიდი ეცი", "მიდი ბოლომდე" და ა.შ.

ვიდეოში ჩანს, რომ ერთ-ერთი ძაღლი თავს ესხმის მეორეს, კბენს და პირს არ უშვებს. ვიდეოში ჩანს, რომ მეორე ძაღლი დასახიჩრდა და დასისხლიანდა.

თითქმის 5 წუთიანი ვიდეო სწორედ ამ სანახაობის შემდეგ სრულდება.

საქართველოს სისხლის სამართლის კოდექსის 259-მუხლის მიხედვით, ცხოველისადმი სასტიკი მოპყრობა:

  1. ცხოველისადმი სასტიკი მოპყრობა, რამაც მისი დაღუპვა ან დასახიჩრება გამოიწვია, აგრეთვე ცხოველის წვალება, ისჯება ჯარიმით ან გამასწორებელი სამუშაოთი ვადით ერთ წლამდე.
  2. იგივე ქმედება, ჩადენილი:
  • ჯგუფურად;
  • არაერთგზის;
  • მცირეწლოვნის თანდასწრებით,

ისჯება ჯარიმით ან თავისუფლების აღკვეთით ვადით ორ წლამდე.

როგორც შსს-ში On.ge-ს განუცხადეს, სამართალდამცავი სტრუქტურის თანამშრომლებს უკვე აქვთ წვდომა ვიდეოზე და არკვევენ, რაიმე სანქციები გატარდება თუ არა აღნიშნული პირების მიმართ.

ვიდეო შეიცავს მძიმე კადრებს. ის შეგიძლიათ ნახოთ ამ ბმულზე.