წინასწარი მონაცემებით, მეორე ტური მცხეთა-მთიანეთის მაჟორიტარულ ოლქშიც გაიმართება. ამის შესახებ პირველი არხის ეთერში ცესკოს თავმჯდომარემ, თამარ ჟვანიამ ისაუბრა.

"სულ ახლახანს დასრულდა მცხეთის საოლქო საარჩევნო კომისიის სხდომა, სადაც საოლქო საარჩევნო კომისიამ თავისი ინიციატივით, ქსნის ციხის შედეგებს ეხება საკითხი, შეისწავლა და გადაამოწმა მონაცემები. დღეს მიღებულ იქნა გადაწყვეტილება, რომ ამ ციხეში მაჟორიტარული ნაწილი შედეგების გაუქმდა, რაც წინასწარი მონაცემებით, შეიძლება მეორე ტური გაიმართოს მცხეთის საარჩევნო ოლქში", — აღნიშნა ჟვანიამ.

მისი განმარტებით, ყველა მაჟორიტარული შედეგი, დაახლოებით 600-მდე ხმა გაუქმდა, რადგან ბიულეტენები არასწორად გაიცა და სპეცსიაში მყოფ ამომრჩეველს მაჟორიტარის არჩევა არ ეკუთვნოდა.

როგორც ცესკოს ვებგვერდზეა აღნიშნული, მცხეთის, დუშეთის, თიანეთისა და ყაზბეგის მუნიციპალიტეტებში ქართული ოცნების კანდიდატს, შალვა კერესელიძე ხმების 50,22% აქვს მიღებული, ხოლო მის ოპონენტს ცეზარ ჩოჩელს — 33,37%. თუ თამარ ჟვანიას სიტყვები გამართლდება, სწორედ ამ კანდიდატს შორის ჩატარდება მეორე ტური.

ამ ეტაპისთვის, 30 მაჟორიტარული ოლქიდან 14-ში პირველივე ტურში ქართული ოცნების კანდიდატებმა გაიმარჯვეს, დარჩენილ 16-ში კი მეორე ტური უნდა დაინიშნოს.