ლელოს გენერალური მდივნის, ბადრი ჯაფარიძის თქმით, ოპოზიციის ერთობლივი განცხადება და ხელმოწერა არის ბრძოლის ნაწილი ხალხის ხმების დასაცავად. ოპოზიციაში აცხადებენ, რომ ერთიანობა არ დაირღვევა და ხელისუფლებას რიგგარეშე არჩევნებს დაანიშნინებენ.

"ჩვენ დავიცავთ ჩვენი მხარდამჭერების და ჩვენი მოსახლეობის ხმებს და ეს ხელმოწერაც არის ამ ბრძოლის ნაწილი. არჩევნები რომ გაყალბდა, ამაზე ორი აზრი არ არის. ჩვენ მივიღეთ სრულიად დამახინჯებული არჩევნები, რაც არ ასახავს ჩვენი მოსახლეობის ნებას და არ შეიძლება, ისეთი პარლამენტი იყოს ლეგიტიმური, რომელიც არ შეესაბამება მოსახლეობის ნებას. დღეს ჩვენ ხელმოწერით დავადასტურეთ ის, რაც სიტყვიერად ითქვა", — განაცხადა ჯაფარიძემ.

ოპოზიციურმა პარტიებმა იმის აღსანიშნავად, რომ მიღებულ მანდატებზე უარს ამბობენ, შეთანხმებას ხელი მოაწერეს. ოპოზიციური პარტიების განცხადებით, 2020 წლის 31 ოქტომბრის საპარლამენტო არჩევნები ამომრჩეველზე ძალადობის, დაშინებისა და მასშტაბური მოსყიდვის ფონზე ჩატარდა. მათივე თქმით, არჩევნების შედეგები არ ასახავს ამომრჩევლის ნებას.

"ჩვენ ოპოზიციური პარტიები, რომელთაც გაგვიყალბეს არჩევნები, უარს ვამბობთ საპარლამენტო მანდატებზე და გადავდგამთ ყველა პოლიტიკურ და სამართლებრივ ნაბიჯს, რომ “დე იურე” და “დე ფაქტო” არ შევიდეთ ამ ე.წ. პარლამენტში. ჩვენ არ მივიჩნებთ ამ პარლამენტს ლეგიტიმურად, რადგან ის არის უკანონო ქმედებების შედეგად არჩეული და არ გამოხატავს ხალხის ნებას. ამ გადაწყვეტილებას სრულად იზიარებენ ქვემორე ხელმომწერი პოლიტიკური პარტიებიც, რომლებიც ამ გაყალბებული არჩევნების შედეგად ცესკოს მიერ გამოქვეყნებული მონაცემებით ვერ მოხვდნენ პარლამენტში", — აცხადებენ ოპოზიციური პარტიები.

ოპოზიციური პარტიების შეთანხმების დოკუმენტს ხელს აწერენ, ასევე, იმ ბლოკებში შემავალი პარტიები, რომლებიც ცესკოს შედგებით, პარლამენტში მოხვდნენ.