ცენტრალური საარჩევნო კომისიის თავმჯდომარემ, თამარ ჟვანიამ განაცხადა, რომ იმ შემთხვევაში დატოვებს თანამდებობას, თუ რომელიმე შედეგი არ იქნება სწორად დათვლილი. ამის შესახებ ცესკოს თავმჯდომარემ რუსთავი 2-ის ეთერში ისაუბრა.

"მე მივიღებ ასეთ გადაწყვეტილებას [გადადგომის] თუ რომელიმე შედეგზე არ მოხდება ისეთი რეაგირება, როგორიც საჭიროა. მე ამას სრული პასუხისმგებლობით ვამბობ", — განაცხადა თამარ ჟვანიამ.

ასევე, ჟვანიამ აღნიშნა, რომ ყველასთვის ხელმისაწვდომია და თითოეულ მოქალაქეს შეუძლია დათვალოს ის, რასაც ცესკო აქვეყნებს და თუ რომელიმე იქნება არასწორი, შემდეგ შეიძლება ისეთ გადაწყვეტილებებზე საუბარი, როგორიც თამარ ჟვანიას გადადგომაა.

საპარლამენტო არჩევნები საქართველოში 31 ოქტომბერს ჩატარდა. ოპოზიცია შედეგებს არ ცნობს, პარლამენტში შესვლას არ აპირებს და რიგგარეშე არჩევნების დანიშვნას მოითხოვს.